Япония ва Америка авиациясининг саккизта қирувчи самолёти Япон денгизи осмонида биргаликдаги парвозни амалга оширди, деб ёзади «РБК».
Япония ҳарбий идораси маълумотларига кўра, парвозда Япония томонидан Ф15 қирувчилари, АҚШ томонидан эса Ф16 қирувчилари қатнашган. Парвоз амалга оширилиши сабабларидан бири сифатида 25 май куни Шимолий Корея томонидан баллистик ракеталар учирилгани тилга олинди. «Биз минтақада тинчлик ва барқарорликка имконият яратиш учун позициямизни ва имкониятларимизни қўллаб-қувватлаймиз ва мустаҳкамлаймиз», — дейилади Япония Мудофаа вазирлиги хабарида.
Айни вақтда, БМТ Хавфсизлик кенгаши баллистик ракеталар парвози учун Шимолий Кореяга нисбатан санкцияларни кучайтиришни кўзда тутувчи, АҚШ томонидан таклиф қилинган резолюция лойиҳасини кўриб чиқишни режалаштирмоқда.
АҚШ президенти Жо Байденнинг Сеул ва Токиога ташрифи ҳамда Quad саммити (Австралия, АҚШ, Ҳиндистон ва Япония иштирокидаги хавфсизлик бўйича тўрт томонлама мулоқот)дан кейин КХДР Япон денгизига қарата учта ракета учирган эди. Япония буни Шимолий Корея томонидан очиқ-ойдин провокация деб атади.
Жанубий Корея ҳарбийлари КХДРнинг ушбу хатти-ҳаракатларига жавобан, «Хенму-2» баллистик ракеталарини учирди, АҚШ эса Япон денгизига қарата битта ATACMS снарядини учирди. Шу тариқа иттифоқчилар иттифоқ кучлари томонидан «зудлик билан зарба берилиши» имкониятларини кўз-кўз қилган.
Таъкидлаш жоиз, Quad саммити чоғида Россия ва Хитой ҳарбий самолётлари фаоллиги ҳам кузатилганди. Япония мудофаа вазирлиги маълумотларига кўра, 24 май куни Хитой ва Россиянинг иккитадан бомбардимончилари биргаликда Япон денгизи устидан учиб ўтиб, сўнг Шарқий Хитой денгизи томонга йўл олган. Шунингдек, Япон денгизи осмонида Россия разведка самолёти ҳам кўринган.
Шу муносабат билан Япония ҳукумати Россияга норозилик эълон қилди, аммо Россия ТИВ уни рад этиб, Хитой билан биргаликдаги парвозлар халқаро ҳуқуқ қоидаларига қатъий риоя қилинган тарзда ўтказилишини таъкидлади.
Изоҳ (0)