Шавкат Мирзиёев ҳузурида 25 май куни мактаб таълимидаги ислоҳотларнинг бориши муҳокама қилинди. Бу ҳақда Президент матбуот хизмати хабар қилди.
Қайд этилишича, йиғилишда халқ таълими вазири соҳадаги ишлар ва келгуси ўқув йилига мўлжалланган режалар тўғрисида ҳисобот берган. Янги миллий дастурни таълим жараёнига жорий этиш масалалари кўриб чиқилган. Хусусан, бу йил 3, 6, 7 ва 10-синфлар учун, 2023—2024 йилларда 4, 5, 8, 9 ва 11-синфлар учун дарсликлар, машқ дафтарлари ҳамда ўқув қўлланмалари яратилиши белгиланган.
Давлат раҳбари бунинг учун хорижий экспертлар ва тадқиқотчилардан иборат ишчи гуруҳини шакллантириб, дарсликларни сифатли тайёрлаш зарурлигини таъкидлаган Йиғилишда педагогик таълимни трансформация қилиш, университетга қабулни такомиллаштириш, илмий салоҳиятни ошириш ва ўқишни амалиёт билан боғлаш бўйича кўрсатмалар берилган. Келгуси ўқув йилидан бошлаб кимё, биология, физика ва математика ўқитувчилари учун касбий сертификатлаш тизими йўлга қўйилиши белгиланган.
Президент мактаб директорларини тўғри танлаш, уларнинг касбий ва бошқарув маҳоратини ривожлантириш масаласига алоҳида тўхталган. Таълим билан бирга тарбия ҳам муҳимлигини таъкидлаган.
«Маънавият мактабдан бошланади. Мактабларда таълим сифатига қандай эътибор берсак, маънавиятга ҳам шундай эътибор беришимиз керак», — деган Шавкат Мирзиёев.
Шу мақсадда ўқувчиларнинг дунёқараши ва иқтидорини оширадиган, турли ёшдаги синфлар учун мўлжалланган маънавият китоблари яратиш бўйича тавсия берилган.
Мактабдан ташқари таълимни ривожлантириш масаласига ҳам тўхталиб ўтилган. «Баркамол авлод» мактаблари фаолияти ва инфратузилмасини яхшилаш бўйича беш йиллик дастур ишлаб чиқиш, уларда STEAM йўналишлари бўйича тўгараклар ташкил этиш вазифаси қўйилган.
Изоҳ (0)