Хитой Ўзбекистондаги ижтимоий лойиҳаларга 37,5 млн доллар ажратади

24 май куни Инвестициялар ва ташқи савдо вазирлигида Ўзбекистон ва Хитой ҳукуматлари ўртасида Техник-иқтисодий ҳамкорлик тўғрисидаги битимни имзолаш маросими бўлиб ўтди. Бу ҳақда вазирлик матбуот хизмати хабар берди.

Ҳужжат Ўзбекистон Инвестициялар ва ташқи савдо вазирининг биринчи ўринбосари Азиз Воитов ва Хитойнинг Ўзбекистондаги фавқулодда ва мухтор элчиси Сзян Ян томонидан имзоланган.

Битим Хитой ҳукумати томонидан Ўзбекистонда ижтимоий аҳамиятга молик лойиҳаларни биргаликда амалга ошириш учун 250 миллион юань (37,5 миллион доллар) миқдорида беғараз ёрдам кўрсатишни назарда тутади.

«Бугунги кунгача икки мамлакат ўртасидаги техник-иқтисодий ҳамкорлик доирасида соғлиқни сақлаш, таълим, қишлоқ ва сув хўжалиги, маданият, транспорт ва бошқа соҳаларда лойиҳалар амалга оширилди», — дейилади хабарда.

Эслатиб ўтамиз, апрель бошларида Ўзбекистон транспорт вазири Илҳом Маҳкамов Хитойнинг Ўзбекистондаги элчиси Сзян Ян хоним билан учрашиб, Хитой—Қирғизистон—Ўзбекистон темир йўли қурилиши лойиҳасини муҳокама қилганди.