Москва ва Киев ўртасида асирларни айирбошлаш таслим бўлган украин ҳарбий хизматчилари устидан суд ўтказилганидан кейингина муҳокама қилиниши мумкин бўлади. Бу ҳақда Россия ташқи ишлар вазири ўринбосари Андрей Руденко маълум қилди, деб ёзади Meduza.
«Асирликка таслим бўлганлар тегишли равишда судланганидан кейин ҳамма нарсаларни кўриб чиқамиз, ҳукм чиқарилсагина бошқа қандайдир қадамлар бўлиши мумкин. Унгача эса айирбошлашув ҳақидаги суҳбатларга эрта», — деди Руденко.
Шунингдек, ташқи ишлар ўринбосари Украина президенти Владимир Зеленскийнинг Украина 24 февралдан кейин Россия қўшинлари томонидан босиб олинган ҳудудларини қайтариб олганидан кейингина музокараларга қайтишга тайёрлиги тўғрисидаги баёнотини ноконструктив деб атади.
Россия ва Украина ўртасида асирлар билан айирбошлашув масаласи май ойида Мариуполдаги «Азовсталь» заводида икки ой мудофаани сақлаб турган украин ҳарбий хизматчилари асирликка таслим бўлганидан кейин фаол муҳокама қилина бошлади.
20 май куни Россия Мудофаа вазирлиги «Азовсталь»дан 2439 нафар украиналик ҳарбий чиққанини маълум қилди. Улар Россия ва Донецк ҳудудидаги озодликдан маҳрум қилиш муассасаларига етказилаётгани хабар берилди.
ДХР раҳбари Денис Пушилин «Азовсталь»дан келтирилган асирлар республикада «халқаро трибунал»га берилишини маълум қилди. Киев улар айирбошлашув натижасида Украина назорати остидаги ҳудудга қайтишини таъкидлаганди.
Мавзуга доир:
- «Азовсталь» асирлари ДХРда халқаро трибуналга тортилиши маълум қилинди
- Россия «Азовсталь» назорат остига олинганини эълон қилди. «Азов» командири гўёки мариуполликларнинг нафрати туфайли у ердан зирҳли автомобилда чиқариб кетилган
- Украиналик ҳарбийлар «Азовсталь»дан эвакуация қилина бошлади. Улар «айирбошлаш жараёни орқали» Киевга топширилиши айтилмоқда
Изоҳ (0)