2019 йилда Lamborghini V12 Vision Gran Turismo — Gran Turismo Sport видеоўйинида виртуал реалликка қўшиш учун махсус яратилган бир ўриндиқли гиперкар тақдимоти ўтказилганди. Аслида ноодатий машина мавжуд эмас, бироқ бу Италия маркаси ишқибозларига виртуал гиперкарни ўз кучлари билан яратишга тўсқинлик қилмади, деб хабар беради Motor.
Lamborghini V12 Vision Gran Turismo’ни ҳақиқатга айлантиришга устанинг ўғли гиперкарга қизиққани сабаб бўлган — ўйинчоқ модель марканинг ёш ишқибозининг севимли овунчоғига айлангани сабаб ота фарзанди учун Gran Turismo Sport’даги машинани ясашга қарор қилган.
Автомобиль кузовини ясашда бир неча турдаги дарахт ёғочидан фойдаланилиб, қўлда қайта ишлов берилган. Панеллар «эшикларни» очишга хизмат қиладиган электр узатмалар билан жиҳозланган пўлат каркасга қотирилган, электромотор ҳам унга ўрнатилган.
Ёғочдан ишланган Lamborghini V12 Vision Gran Turismo мустақил ҳаракатланишга қодир. Модель тўлиқ бошқарилувчан — ҳатто рули ёғочдан ишланган — кузов ва ғилдиракларидаги ёруғлик диодлар қаерга бурилишни кўрсатади. Уста ушбу ноёб гиперкарни ясашга 96 кун сарфлаган.
Аввалроқ АҚШда ота ўғли учун ўзининг Ford Mustang Shelby GТ500 автомобилининг митти нусхасини совға қилганди. Ундан олдинроқ эса ўйинчоқ пулемёт ва тутун чиқарувчи қурилмага эга болалар Aston Martin’и тақдим этилгани, Toyota водородда ҳаракатланувчи ўйинчоқ Mirai’ни ясагани тўғрисида хабар берилганди.
Изоҳ (0)