Калифорниянинг Монтерей шаҳрида ўтказиладиган Broad Arrow Auctions аукционида Шон Коннерига тегишли бўлган Aston Martin DB5 кимошдига қўйилади. Машҳур киноактёрнинг автомобили 1,4—1,8 миллион долларга баҳоланмоқда. Шасси рақами DB5/1681/R, кузов ранги Snow Shadow Grey, салони қизил ҳамда капоти остидан 4,0 литрли V6 мотор ўрин олган автомобиль яхши ҳолатда сақланган, деб хабар беради Motor.
2020 йилнинг 31 октябрь куни Жеймс Бонд роли орқали дунёга танилган шотландиялик актёр Шон Коннери вафот этгани маълум бўлганди. Актёр Швейцариядаги уйи ва машҳур Aston Martin DB5 автомобили сақланган гаражини оиласига қолдириб, 90 ёшида оламдан ўтган.
Автомобиль 1964 йилда Артур Уайт исмли шахс учун ясалиб, унга етказиб берилгани маълум. Машина 2018 йилда Коннери Ричард Уиллямс томонидан Aston Martin RS Williams компанияси орқали сотиб олгунига қадар Буюк Британияда сақланган.
Мазкур нусха беш поғонали ZF механик узатмалар қутиси билан жиҳозланган ва дастлаб қора салонга эга California Sage Blue кўк рангида бўлган. Коннери автомобилнинг ташқи кўриниши жосус 007 нинг машинаси рангида бўлишини хоҳлагани сабаб, у Snow Shadow Grey кумуш рангига бўялган ва салони қизил чарм билан қопланган.
Бундан олдин 2002 йилда катта экран юзини кўрган «Ҳалок бўл, лекин ҳозир эмас» фильмида Жеймс Бонд ролини ижро этган актёр Пирс Броснан қандай қилиб Aston Martin’ни ўзига суперкар совға қилишга кўндирганини сўзлаб берганди.
Изоҳ (0)