Германияда маймунчечак билан касалланганлар учун 21 кунлик карантин жорий қилинди

Германия соғлиқни сақлаш вазири Карл Лаутербах маймунчечак билан касалланганлар учун 21 кунлик карантин эълон қилди.

«Бугун биз федерал штатлар расмийлари билан биргаликда Роберт Кох институтининг тавсияларини амалга оширдик, тавсияларнинг асосий қисмига кўра, касалланганлар камида 21 кун изоляция қилиниши керак», — деди Лаутербах 24 май куни бўлиб ўтган матбуот анжуманида.

Изоляция маймунчечакка чалинган одамлар билан алоқада бўлганлар учун ҳам «қатъий тавсия этилади», деди у.

Франция ва Дания соғлиқни сақлаш идоралари маймунчечак беморлари билан алоқада бўлганларни эмлашни тавсия қилди. Францияда 3 кишида, Данияда 2 кишида маймунчечак аниқланган.

«Бугунги кунда ҲАС (Франциядаги энг юқори соғлиқни сақлаш органи — «Дарё» изоҳи) касаллик тасдиқланган ҳолатлар, беморлар билан алоқаси хавфли деб ҳисобланадиган катталар, шу жумладан шахсий ҳимоя воситаларисиз беморларга қараган тиббиёт ходимлари учун эмлаш стратегиясини амалга оширишни тавсия қилмоқда», — дейилади баёнотда.

Францияда эмлаш учун Имванех чечакка қарши вакцинаси тавсия этилган.

Данияда касалликнинг оғир кечиши хавфини камайтириш учун инфекцияга чалинган одамлар билан яқин алоқада бўлганларни эмлаш таклиф қилинмоқда.

24 май куни Moderna компанияси маймунчечакка қарши вакцина бўйича тадқиқотлар ўтказаётганини маълум қилди.

Шу куни Словения ва Чехияда маймунчечак билан касалланиш бўйича дастлабки ҳолатлар аниқлангани маълум қилинди. Словенияда вирус яқинда Канар оролларидан қайтган эркакда топилган. Унда касаллик ўртача оғирликда кечмоқда, эркак касалхонага ётқизилмаган.

Словения соғлиқни сақлаш расмийлари мамлакатда маймунчечакнинг тарқалишини тезда тўхтатиш мумкинлигига ишонмоқда, лекин шу билан бирга улар касал одам билан алоқада бўлган барчани 21 кунлик карантинда ўтиришга чақирди.

Аввалроқ Жаҳон соғлиқни сақлаш ташкилоти (ЖССТ) маймунчечак билан касалланиш ҳолатлари 16 та мамлакатда аниқлангани ҳақида хабар берганди. Касаллик жумладан Португалия, Испания ва Буюк Британияда энг кўп аниқланган — 21 дан 30 кишигача. Suningдек, маймунчечак Австралия, Бельгия, Канада, Франция, Германия, Италия, Нидерландия, Швеция, Исроил ва АҚШда ҳам тарқалмоқда.