Шимолий Корея коронавирусга қарши курашда муваффақият қозонганини маълум қилди

Шимолий Корея мамлакатда эпидемиологик вазият барқарорлашаётганини маълум қилди, деб ёзмоқда Reuters.

Шимолий Корея вирус тарқалишининг олдини олишда «муваффақият қозонганини» ва 134 510 нафар янги бемор қўшилганига қарамай, 23 май оқшомида «безгак»дан янги ўлим ҳолатлари қайд этилмаганини хабар қилди.

Расмий Корея марказий телеграф ахборот агентлиги маълумотларига кўра, касалликка чалиниш бўйича тасдиқланган ҳолатлар кетма-кет учинчи кун 200 000 дан паст бўлди ва касалланганлар сонини эълон қилиш бошлангандан буён биринчи марта янги ўлим ҳолатлари қайд этилмади.

Тест ўтказиш учун зарур материаллардан маҳрум Шимолий Корея афтидан коронавирусга чалинган одамларнинг умумий сонини тасдиқламаган, аксинча, фақат безгак белгилари бор беморлар ҳақида хабар берган. Корея марказий телеграф агентлиги маълумотларига кўра, апрель ойининг охиридан бери бундай белгилар қайд этилган одамларнинг умумий сони 2,95 миллионга етди, қурбонлар сони эса 68 нафарни ташкил этмоқда.

24 май куни Шимолий Кореяда COVID-19 дан ўлим даражаси 0,13 фоизни ташкил этди. Бироқ кўплаб таҳлилчилар рақамларнинг тўғрилигига шубҳа билан қарамоқда ва бу рақамлар фақат изоляциядаги мамлакатда коронавирус тарқалишининг ҳақиқий кўламини баҳолаш қанчалик қийинлигини кўрсатишини айтмоқда.

13 май куни Шимолий Кореяда COVID-19 дан биринчи ўлим қайд этилган эди. Шунингдек, мамлакатда коронавирус билан касалланганлар сони икки миллионга яқинлашгани маълум.

Шу фонда Шимолий Корея етакчиси Ким Чен Ин Сиёсий бюронинг фавқулодда йиғилишини ўтказиб, Пхеньянда дори-дармон таъминотини барқарорлаштириш учун ҳарбийлардан фойдаланишни буюрди.