Germaniyada maymunchechak bilan kasallanganlar uchun 21 kunlik karantin joriy qilindi

Germaniya sog‘liqni saqlash vaziri Karl Lauterbax maymunchechak bilan kasallanganlar uchun 21 kunlik karantin e’lon qildi.

“Bugun biz federal shtatlar rasmiylari bilan birgalikda Robert Kox institutining tavsiyalarini amalga oshirdik, tavsiyalarning asosiy qismiga ko‘ra, kasallanganlar kamida 21 kun izolyatsiya qilinishi kerak”, — dedi Lauterbax 24-may kuni bo‘lib o‘tgan matbuot anjumanida.

Izolyatsiya maymunchechakka chalingan odamlar bilan aloqada bo‘lganlar uchun ham “qat’iy tavsiya etiladi”, dedi u.

Fransiya va Daniya sog‘liqni saqlash idoralari maymunchechak bemorlari bilan aloqada bo‘lganlarni emlashni tavsiya qildi. Fransiyada 3 kishida, Daniyada 2 kishida maymunchechak aniqlangan.

“Bugungi kunda HAS (Fransiyadagi eng yuqori sog‘liqni saqlash organi — “Daryo” izohi) kasallik tasdiqlangan holatlar, bemorlar bilan aloqasi xavfli deb hisoblanadigan kattalar, shu jumladan shaxsiy himoya vositalarisiz bemorlarga qaragan tibbiyot xodimlari uchun emlash strategiyasini amalga oshirishni tavsiya qilmoqda”, — deyiladi bayonotda.

Fransiyada emlash uchun Imvanex chechakka qarshi vaksinasi tavsiya etilgan.

Daniyada kasallikning og‘ir kechishi xavfini kamaytirish uchun infeksiyaga chalingan odamlar bilan yaqin aloqada bo‘lganlarni emlash taklif qilinmoqda.

24-may kuni Moderna kompaniyasi maymunchechakka qarshi vaksina bo‘yicha tadqiqotlar o‘tkazayotganini ma’lum qildi.

Shu kuni Sloveniya va Chexiyada maymunchechak bilan kasallanish bo‘yicha dastlabki holatlar aniqlangani ma’lum qilindi. Sloveniyada virus yaqinda Kanar orollaridan qaytgan erkakda topilgan. Unda kasallik o‘rtacha og‘irlikda kechmoqda, erkak kasalxonaga yotqizilmagan.

Sloveniya sog‘liqni saqlash rasmiylari mamlakatda maymunchechakning tarqalishini tezda to‘xtatish mumkinligiga ishonmoqda, lekin shu bilan birga ular kasal odam bilan aloqada bo‘lgan barchani 21 kunlik karantinda o‘tirishga chaqirdi.

Avvalroq Jahon sog‘liqni saqlash tashkiloti (JSST) maymunchechak bilan kasallanish holatlari 16 ta mamlakatda aniqlangani haqida xabar bergandi. Kasallik jumladan Portugaliya, Ispaniya va Buyuk Britaniyada eng ko‘p aniqlangan — 21 dan 30 kishigacha. Suningdek, maymunchechak Avstraliya, Belgiya, Kanada, Fransiya, Germaniya, Italiya, Niderlandiya, Shvetsiya, Isroil va AQSHda ham tarqalmoqda.