Тошкент аҳолиси жамоат жойларида, хусусан, кўчада тамаки чеккани учун жаримага тортилаётганликлари ҳақида хабарлар тарқалди, деб ёзмоқда «Потребител» гуруҳи.
Жаримага тортилганлар орасида бир неча киши бўлиб, улардан бири электрон сигарета чеккани учун жазоланган. Маъмурий жавобгарликни рўйхатдан ўтказиш жараёни осон: ҳуқуқ-тартибот органи ходими фуқародан паспортини кўрсатишни, ёки планшетга бармоқларини босишни сўрайди ва бу жаримани расмийлаштириш учун етарли.
«Эрим ҳозир уйга келаётганида тамаки чеккани учун жаримага тортишибди. Жарима 90 минг сўм, телефонга SMS келди. Агарда тезда тўласак, 63 минг сўм экан. Мен нимадандир бехабармани, ҳамма чекяпти-ку? Айнан қаерда чекиш керак?», — деб ёзади интернет фойдаланувчиларидан бири.
Маъмурий жавобгарлик тўғрисидаги кодекснинг 56-1-моддасига кўра (иш жойларида, соғлиқни сақлаш, таълим, спорт-соғломлаштириш муассасаларида, ёнғин чиқиш хавфи бўлган жойларда, шу жумладан, автомобилларга ёнилғи қуйиш шохобчаларида ва бошқа жамоат жойларида тамаки маҳсулотини истеъмол қилиш, бундан тамаки маҳсулотини истеъмол қилиш учун махсус ажратилган жойлар ва (ёки) хоналар мустасно) базавий ҳисоблаш миқдорининг учдан бир қисми миқдорида жарима (90 минг сўм) солишга сабаб бўлади.
Шу билан бирга, интернет фойдаланувчилари тамаки чекувчилар учун Тошкентда махсус жойлар деярли йўқлигини таъкидламоқда. Бундай жойларни катта боғлар ва аэропортда учратиш мумкин, холос.
Изоҳ (0)