Тошкентда синтетик гиёҳванд моддаларни белгиланган бир манзилдан бошқасига етказиш билан шуғулланган қиз ушланди

Тошкентда синтетик гиёҳванд моддаларни бир манзилдан олиб, бошқасига етказиш билан шуғулланган қиз қўлга олинди. Бу ҳақда пойтахт ИИББга таяниб, UzNews хабар берди.

Маълум қилинишича, 14 май куни Яккасарой тумани ИИБга синтетик гиёҳванд моддаларни белгиланган манзилга ташлаб кетганликда гумон қилинган қиз олиб келинган. Шахсий тинтув чоғида қизнинг футболкаси остидан наркотик моддаси белгиланган 36 та манзил топилган. Шунингдек, унинг сумкасида яна бир белгиланган манзил ва 5 минг сўмлик банкнотга ўралган гашиш топилган.

Суҳбат чоғида қиз бу иш билан 2021 йилнинг ноябрь ойидан бери шуғулланиб келгани аниқланган. Унинг телефонида наркотик моддалар яширилган жойлар манзилининг фотосуратлари топилган, бироқ кўрсатилган манзиллар кўздан кечирилганда гиёҳванд моддалар йўқлиги маълум бўлган.

Қизнинг сўзларига кўра, у гиёҳванд моддаларни интернет-дўкон орқали олган. «Улар менга геолокацияни юборишди. Мен у ерга бордим ва у ердан мол олиб кетдим. Улар менга қайси ҳудудда қолдириш кераклигини айтишди. Шундан сўнг мен уларга манзиллар кўрсатилган фотосуратларни юбордим ва улар манзилларни мижозларга сотишди. Менга ҳар бир манзил учун 5 доллардан тўлашди», — дейди қиз. Мазкур факт бўйича экспертиза тайинланган, қизга психотроп моддаларни сақлаш ва сотиш айби қўйилган. Ҳозирда тергов ҳаракатлари олиб борилмоқда.

Бундан олдин ДХХ Тошкентда нарколаборатория ташкил қилган икки кишини қўлга олгани, Ўзбекистонда Тожикистондан келтирган гиёҳванд моддаларни сотиш билан шуғулланган шахслар ушлангани, ДХХ Бухорода гиёҳванд моддани 2,5 минг долларга сотишга уринган Афғонистон фуқаросини қўлга олгани тўғрисида хабар берилганди.