Наманганда 61-халқаро гуллар фестивалининг очилиш маросими бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Фестивальни 200 дан ортиқ гулларга бурканган автокарвон бошлаб берди.
Уларни Наманган шаҳридаги Хотира хиёбони олдида минглаб наманганликлар, вилоят раҳбарлари, чет эллик меҳмонлар ва дипломатик корпус вакиллари кутиб олди.
Автокарвоннинг манзилга етиб келиши ва очилиш маросими Наманганда кучли ёмғир бошланишига тўғри келди. Бироқ об-ҳавонинг бундай кескин ўзгариши ҳам фестивалнинг байрамона кайфиятига таъсир қилмади.
Фестивальнинг очилиш маросимида вилоят ҳокими Шавкат Абдураззоқов сўз олди. У тадбирга узоқ-яқиндан ташриф буюрган меҳмонлар, фестивалнинг юқори савияда ўтиши учун астойдил меҳнат қилган наманганликларга миннатдорлик билдирди.
«Олдинлари вилоят, нари борса водий миқёсида ўтказиб келинган гуллар байрами давлат раҳбарининг ташаббуси билан халқаро мақомга эга бўлди. Бунга яраша тадбиримизга бўлган эътибор ва қизиқиш ҳам йилдан йилга ортиб бормоқда. Шу боис бу йил фестивални икки ҳафта давомида ўтказишга қарор қилдик», — деди Шавкат Абдураззоқов.
Дилноза Кубаева ва Илҳом Абдураҳимов олиб борган очилиш маросимининг бадиий қисмида Алишер Файз, Илҳом Иброҳимов, Баҳром Назаров, Ҳамдам Собиров, «Ҳавас» гуруҳи ва вилоят санъаткорларининг чиқишлари тингланди.
Шундан сўнг рамзий лента қирқилиб, Бобур номли боғда ташкил этилган композициялар билан танишув бошланди. Меҳмонлар вилоятнинг шаҳар-туманлари, корхона-ташкилот ва компаниялари томонидан тақдим этган кўргазмаларни қизиқиш билан кўздан кечирди.
Ушбу жараёнларни хорижий, марказий ва маҳаллий газеталар, телеканаллар, электрон нашрларнинг ўнлаб вакиллари ёритиб борди. Бу борада айниқса ноқулай об-ҳаво шароитига қарамай вазифасини сидқидилдан бажарган фото ва телеоператорлар фаолияти алоҳида эътироф этилди.
Намангандаги 61-халқаро гуллар фестивали давом этмоқда. Байрамга Қорақалпоғистон республикаси, Тошкент шаҳри ва вилоятлар ҳамда қўшни мамлакатлардан келаётган меҳмонлар оқими ортиб бормоқда.
Изоҳ (0)