Ўзбек санъат вакилларининг ўзига ўхшаш опа-сингиллари ёки ака-укалари борлигини биласизми? Улардаги ўхшашлик сабаб мухлислар ҳам севимли санъаткорлари қайси эканлигини англолмай қолишган вақтлари ҳам бўлган. Қуйида улар билан яқиндан танишамиз.
Фаррух ва Азиз Раимовлар
Хонанда Фаррух Раимовнинг ўзидан олти ёш катта Азиз исмли акаси бор. Азиз Раимов бир неча йилдан буён савдо-сотиқ билан шуғулланади.
— Укангизга ўхшар экансиз, деган гапни кўп эшитаман. Аслида у менга кўпроқ ўхшайди. Яқинда бир қизиқ воқеа бўлди. Укам Фаррухнинг машинасини ҳайдаб кетаётгандим, аксига олиб йўл патруль хизмати ходими тўхтатди. Ёнимда ҳайдовчилик гувоҳномам йўқ, деб тургандим «Сизни танидим», деб қолди. Ҳаяжонланганимдан укамнинг ҳайдовчилик гувоҳномасини кўрсатганимни билмай қолибман. Ходим ҳеч нарсани пайқамай, мен билан суратга тушиб, оқ йўл тилади, — дейди Азиз Раимов.
Женисбек ва Ақлбек Пиязовлар
Ўзбекистон халқ артисти Женисбек Пиязовнинг ўзидек опера хонандаси бўлган укаси бор. Ақлбек Пиязов акасидан 9 ёш кичик бўлса-да, унга жуда ўхшайди.
— Ташқи кўринишимиз ўхшаш бўлгани учун қизиқарли воқеалар жуда кўп бўлади. Масалан, акам гастрол сафарлари сабаб тўй хизматлари ёки концертларга етиб боролмаса, мен саҳнага чиқишимга тўғри келади. Албатта, бундай вазиятда мезбонларни огоҳлантириб қўямиз. Яқинда «Яккасарой» тўйхонасида хизматимиз бор эди. Акам эса концерт сабаб Олмалиққа кетганди. Ўз вақтида етиб келолмагани учун тўйда ўзим иштирок этдим. Учинчи қўшиқни берилиб куйлаётганимда орқамда кимдир қарсак чалди. Қарасам, ҳақиқий Женисбек Пиязов кулиб турибди, — дейди Ақлбек Пиязов.
Алишер ва Хуршид Турдиевлар
Хонанда Алишер Файзнинг ўзига икки томчи сувдек ўхшайдиган хонанда укаси бор. Хуршид Турдиев ҳам бир неча йилдан буён санъатда фаолият юритади.
— Ташқи кўринишимни акамга ўхшатишади, аммо мендан кўра ўртанча акам Валижон кўпроқ ўхшайди, деб ҳисоблайман. Ҳозир-ку кўпчилик Алишер Файз акам эканлигини яхши билади. Илгари кўпчилик билмагани учун қизиқарли воқеалар жуда кўп бўларди. Тўй-тантаналарда одамлар мени Алишер Файз ёки бошқа хонандалигим бўйича гаров ўйнаган пайтлари ҳам бўлган. Ҳатто бир тўйда менга акамнинг суратини кўрсатиб, шу одамга ўхшаркансиз, дейишган. Ўзимни билмаганга олиб, ростдан ўхшаш эканмиз деганман, — дейди Хуршид Турдиев.
Нигора ва Замира Исмоиловалар
Хонанда Нигоранинг ўзидан 6 ёш катта Замира исмли опаси бор. Замира бир неча йиллардан буён кутубхона мудираси бўлиб ишлайди.
— Болаликдан опам иккимизни бир-биримизга ўхшатишарди. Нафақат юз тузилишимиз, ҳатто бўй-бастимиз ҳам жуда ўхшаш. Шу боис ҳаётимизда қизиқарли воқеалар жуда кўп бўлган. Бир йили Самарқандга хизматга борадиган кунимиз қаттиқ оғриб қолдим. Ёнимда ишончли одам бўлсин, деб опамни ҳам олиб кетадиган бўлдик. Йўлда дам олиш учун тўхтаганимизда бир нечта сотувчи қизлар менинг ёнимдан индамай ўтиб кетиб, тўғри опамнинг олдига боришган. Мен эса машинага ўтириб олганман. Қизларнинг бари опам билан суратга тушишган. Опам қайтгач, «Нега бундай қилдинг? Роса ноқулай бўларкан?» деб койиб берганди. Нима қилай, қизларга у эмас, мен Нигораман, дейиш менга ҳам ноқулай бўлди-да, дегандим, — дея хотирлайди Нигора.
Алишер ва Сарвар Узоқовлар
Актёр ва бошловчи Алишер Узоқовга жуда ўхшаш акаси бор. Сарвар Узоқов Алишердан тўрт ёш катта ва айни кунларда тадбиркорлик билан шуғулланади.
— Дадам вафотига қадар унинг ёлғиз ўғлиман ва унга жуда ўхшайман, деб юрардим. Вафотларидан сўнг дадамнинг биринчи турмушидан Сарвар исмли ўғиллари борлиги ҳақида эшитдим. Илк марта акам билан учрашганимда у мендан кўпроқ дадамга ўхшашлигига гувоҳ бўлдим. Нафақат ташқи кўриниши, балки феъл-атвори ҳам жуда ўхшайди. Акам бир неча йилдан буён тадбиркорлик билан шуғулланади. Акам билан бир-биримизга жуда ўхшаймиз. Бизни яқиндан билган инсонлар қиёфамиз ўхшашлигини айтишади, — дейди актёр Алишер Узоқов.
Зиёда ва Азиза Қобиловалар
Хонанда Зиёданинг ҳам ташқи кўриниши ўзига ўхшаш синглиси бор. Азиза Қобилова ҳам санъатга қизиқиб, шу йўналишда таҳсил олган.
— Азиза билан эгизакларга ўхшаймиз. У билан боғлиқ қизиқарли воқеалар кўп бўлган. Масалан, кўча-кўйда одамлар Азизани мен деб ўйлаб, у билан расмга тушишган. Ҳатто худди шундай ҳолат концертларда ҳам бўлган. Азизанинг овози ниҳоятда ширали, фақат йўналиши бошқача. У кўпроқ хориж мусиқасига қизиқади. Райёна исмли ширин қизчаси бор, — дейди хонанда Зиёда.
Севинч ва Шаҳло Мўминовалар
Хонанда Севинч Мўминованинг ўзига ўхшаш Шаҳло исмли опаси бор. Опа-сингилларнинг орасида бир ёш фарқ бор. Instagram кузатувчилари хонанданинг қизи Лейлани Шаҳло холасига ўхшатишади.
— Шаҳло опам билан деярли тенгдошдек улғайганмиз. Ташқи кўринишимиз ўхшаш бўлгани учун илгари бизни эгизак деб ўйлашарди. Шаҳло Англияда таҳсил олган, таржимон ва иқтисодчилик мутахассисликларини эгаллаган. Айни кунда фарзандлари тарбияси билан банд, — дейди хонанда Севинч Мўминова.
Лола ва Анора Йўлдошевалар
Ижодий танаффусдаги хонанда Лоланинг ўзига жуда ўхшайдиган синглиси бор. Анора Илёсова айни кунда тўрт ўғли ва турмуш ўртоғи билан АҚШда яшайди. У Ўзбекистонда яшаган вақтда «Ўзбегим таронаси» радиосида бошловчилик ҳам қилган.
Изоҳ (0)