O‘zbekistonlik mashhurlarning opa-singillari nima ish qiladi? (foto)

O‘zbek shou-biznesi vakillarining opa-singillari qaysi sohalarda faoliyat yuritadi? Jurnalist Nargiza Murodova taniqli xonanda va aktrisalarning opa-singillari haqida ma’lumot to‘pladi.

O‘zbekistonda xizmat ko‘rsatgan artist Yulduz Turdiyevaning yakka-yu yagona Laziza ismli opasi bor. Xonanda undan nihoyatda minnatdor. Boisi opasi o‘z farzandlaridan ortib, singlisining ikki o‘g‘lining parvarishiga ham alohida ahamiyat beradi. Yulduz bekalar vazifalarini bajarishda, albatta, opasi bilan maslahatlashadi.

O‘zbekistonda xizmat ko‘rsatgan artist Ziyoda opa-singillarga boyligi bilan ijodkorlar orasida ajralib turadi.  Uning Aziza ismli singlisi opasiga havas qilib san’at sohasini egalladi. Bir qarashda opa singilni bir-biridan ajratish mushkul. Ular bir-biriga juda o‘xshaydi. Hozirda Aziza ijoddan bir muddat cheklanib, farzandinining tarbiyasi bilan band.

Aktrisa Asal Shodiyevaning Robiya ismli singlisi bor. U opasidan farqli ravishda bolaligidan san’atga qiziqmagan. Robiya bugungi kunda kosmetolog sifatida faoliyat yuritadi. U oilali, bir nafar o‘g‘il farzandi bor.

Xonanda Lola Yo‘ldoshevaning ham ikki singlisi bor. Katta singlisi Anora bir necha yil avval rusiyzabon teleboshlovchisi sifatida faoliyat yuritardi. Hozirda to‘rt farzandning onasi bo‘lgan Anora bir necha yildan buyon AQShda istiqomat qiladi. U Instagram’dagi shaxsiy blogini yuritadi. Oilaning kenja farzandi Asal ham Insta-bloger. Asalning Amir ismli o‘g‘il farzandi bor.

Aktrisa Sitora Alimjonovaning birgina opasi bor. Dildora Hoshimova taqdir taqozosi bilan Janubiy Koreyaga turmushga chiqqan, hozirda u ikki farzandning onasi. Asli jurnalistikaga qiziqqan Dildora koreys televideniyasida qator teleloyihalarga boshlovchilik qilgan. So‘nggi yillarda esa singlisi yordamida o‘zbek kino san’atida ham o‘z o‘rnini topishga harakat qilyapti. U  “Milliy” telekanalida efirga uzatilgan “Sevgi” serialida ham suratga tushgan.

Jasur Umirovning singlisi Guli Umirova Instagram’da blog yuritadi. Uning sahifasini 55,9 ming kishi kuzatadi. Guli sahifasiga oilaviy suratlarini joylab boradi.

Yosh aktrisa Durdona Qurbonovaning singlisi Ruxshona Qurbonova qo‘shiqchilikka qiziqadi. Ruxshona ayni kunlarda musiqa maktabida tahsil oladi va Instagram orqali ijod namunalarini havola etib boradi. Uning kuzatuvchilari soni 66 mingdan ortiq.

Xonanda Munisa Rizayeva oilasida uch qiz ekanligini ko‘plab intervyularida aytib o‘tgan. Singlisi Karima Rizayeva qator teleloyihalarga prodyusserlik qilgan. U ham xuddi opasi singari biznesga juda qiziqadi. Ularning katta opasi Kamila bir necha yil avval oilasi bilan London shahriga ko‘chib ketgan. U interyer dizayni bilan shug‘ullanadi va shaxsiy agentligini ham tashkil etgan. Bundan tashqari, u xorijda o‘zbek milliy bezakchilik san’ati targ‘iboti bilan ham shug‘ullanadi.

Ozoda Nursaidovaning ham yagona, Nilufar ismli singlisi bor. Nilufar yoshligidan opasining karyerasiga o‘z hissasini qo‘shishga qaror qilgan. Ancha yillar avval ko‘nglida xonandalikka mehr uyg‘onib, qo‘shiq ijro etib ko‘rdi. Ammo muvaffaqiyatsiz kechgan ilk urinish uni bu fikridan qaytardi. Bir o‘g‘ilchanig onasi bo‘lgan Nilufar hozirda opasi Ozoda Nursaidovaning yordamchisi sifatida faoliyat yuritadi.

Xonandalar Lola va Shahlo Ahmedovalar oilada uch qiz. Lolaning singlisi, Shahloning opasi Zulayho Turkiyada o‘z karyerasini rivojlantirish ustida ishlamoqda. U imij stilistikasi va fotograflikka qiziqadi.

Xonanda Otabek Muhammadzohid O‘zbekiston xalq artisti Gulsanam Mamazoitovaning akasi ekanligini ko‘pchilik biladi. Ammo uning o‘zidan bir necha yosh katta opasi borligini xonandaning aksariyat muxlislari bilmasa kerak. Go‘zalxon bank xodimi va u Farg‘onada istiqomat qiladi. Bolaligidan hisob-kitobga usta bo‘lgan Go‘zalxon oliygohga imtiyozli ravishda o‘qishga qabul qilinib, o‘z sohasining yetuk mutaxassisi bo‘lgan.