Канадада икки кишида маймунчечак билан касалланиш ҳолати тасдиқланди, Австралияда эса бир киши ушбу инфекцияга чалинганликда гумон қилинмоқда. Бу ҳақда икки давлат соғлиқни сақлаш вазирликларининг сайтларига таяниб «РБК» хабар берди.
«Квебек провинциясига Миллий микробиологик лаборатория томонидан олинган иккита намунада маймунчечак касаллиги аниқлангани ҳақида хабар берилди. Бу Канадада тасдиқланган дастлабки иккита ҳолат», — дейилади Канада соғлиқни сақлаш вазирлиги баёнотида.
Квебек — мамлакатнинг шарқий провинцияларидан бири, жанубда у АҚШ билан чегарадош. Вазирликнинг таъкидлашича, чечак билан касаллангани тахмин қилинаётган америкалик яқинда провинциядаги шаҳарларидан бири — Монреалга ташриф буюрган.
Маълумот учун, маймунчечак биринчи марта 1958 йилда аниқланган ноёб юқумли касалликдир. У билан касалланиш асосан, Африкада кузатилган: одатда ушбу касалликни 16 ёшгача бўлган ўсмирлар юқтирган. Тадқиқотлар шуни кўрсатдики, маймунчечак кўпроқ чечакка ўхшайди. Касалликнинг ўлим даражаси тахминан 10 фоизни ташкил қилади, эҳтимолий асоратлар орасида энсефалит, менингоэнсефалит, пневмония, сепсис мавжуд. Табиий чечакка қарши эмлаш маймунлар орасида кенг тарқалган ушбу вирусга қисман иммунитетни таъминлайди.
«40 ёшлардаги эркак Сиднейга қайтганидан бир неча кун ўтгач унда енгил симптомли касаллик пайдо бўлди. Кейинчалик у шифокорига клиник жиҳатдан маймунчечакка ўхшаш аломатлар ҳақида хабар берди», — дейилади Австралия соғлиқни сақлаш вазирлиги хабарида. Шошилинч текширув натижаларига кўра, эркак чечакнинг ушбу тури билан касалланган, аммо иккинчи тасдиқловчи тадқиқот ўтказилмоқда, бемор изоляцияга олинган.
Сал аввал маймунчечак АҚШ ва Европада қайд этилган. Хусусан, 7 май куни Буюк Британияда бир кишида — Нигериядан қайтган одамда касаллик аниқланди. 18 май куни эса Қўшма Штатларда Канадада бўлиб қайтган беморда инфекция қайд этилди.
Изоҳ (0)