АҚШ сенати Украинага тахминан 40 миллиард доллар миқдорида қўшимча ёрдам ажратиш ҳақидаги қонун лойиҳасини бир овоздан маъқуллади, дея хабар қилган Associated Press.
Сенаторлар қонунни ўтган ҳафтадаёқ тезкор тартибда қабул қилмоқчи эди, аммо республикачи Ренд Пол мазкур ҳужжатга бир қатор ўзгартиришлар киритиш юзасидан таклиф бериб, ушбу жараённи муайян вақтга блоклаган.
Апрель охирида АҚШ президенти Жо Байден мамлакат Конгрессидан Украинани қўллаб-қувватлаш учун 33 миллиард доллар ажратишни сўраган. Кейинчалик ёрдам пули миқдори Конгресснинг ўзида қарийб 40 миллиардга оширилган. Шундан тенг ярми, яъни 20 миллиард ҳарбий кўмак сифатида йўналтирилади.
11 майда қонун ҳужжатини АҚШ конгрессининг вакиллар палатаси маъқуллаган. Ҳужжатни имзолаш учун 368 нафар конгрессмен овоз берган (барча демократлар ва айрим республикачилар), 57 нафар вакил эса уни имзолашга қарши чиққан (барчаси республикачилар).
Пентагон ҳисоб-китобларига кўра Украинада уруш бошланганидан бери 6 май ҳолатига Украинага АҚШ ҳукумати томонидан 3,8 миллиард долларлик ҳарбий ёрдам юборилган. 9 майда Байден Украинага ленд-лиз дастури бўйича қурол-яроғ етказиб бериш ҳақидаги қонунни имзолаганди.
Изоҳ (0)