Франция президенти Эммануэль Макрон Молдова давлат раҳбари Майа Санду билан учрашувда Украинадаги низо ушбу мамлакатга ҳам кўчиши мумкинлиги ҳақида огоҳлантирди.
«Россиянинг Украинага бостириб киргани бутун минтақа барқарорлигига хавф туғдиради ва бундан айниқса Молдова жабр кўриши мумкин. Приднестроведаги ҳодисалар Украинадаги низонинг қўшни мамлакатларда ҳам кузатилиши эҳтимоли мавжудлигини кўрсатмоқда», — деган Макрон («РИА Новости» иқтибоси).
Молдова шимолда, шарқда ва жанубда Украинанинг Одесса, Винницк ва Черновицк вилоятлари билан чегарадош. Минтақадаги вазият Россия Мудофаа вазирлиги Донбасс ва Украина жанубини назорат қилиш учун олиб борилаётган операцияларнинг янги босқичи бошланганини эълон қилганидан кейин кескинлашган. Россия Мудофаа вазирлиги мазкур операциянинг аҳамияти Приднестровега йўлак очиб рус тилида сўзлашадиган аҳолига ўтказилаётган босимларга барҳам беришдан иборатлигини қайд этган.
26 апрелда Приднестровяда кетма-кет портлашлардан сўнг террорчиликнинг қизил даражаси эълон қилинди, Тираспол ҳудудда терактлар бўлиши мумкин деб ҳисобламоқда. Портлашлардан бири Республика давлат хавфсизлиги вазирлиги биноси яқинида юз берган, ҳукумат бинога гранатомётдан ўт очилган деб ҳисобламоқда. Маяк қишлоғида Россия радиосини ретрансляция қилувчи марказнинг икки антеннаси ишдан чиқарилган. Шунингдек, Паркана қишлоғидаги ҳарбий қисмга ҳужум уюштирилган. 13 майда Тирасполдаги ҳарбий чақириққа тайёрлов биносига портлайдиган аралашма солинган шиша идиш улоқтирилган. Приднестрове мазкур ҳужумлар номаълум шахслар томонидан қилинаётгани ва улар Украина ҳудудидан ноқонуний равишда Молдовага кириб олганини таъкидлаган.
Украина президенти Владимир Зеленский Россияни минтақадаги вазиятни беқарорлаштиришга уринганликда айблаган. Россия Ташқи ишлар вазирлиги вакили Мария Захарова бунга жавобан Москва номаълум кучларнинг минтақада низо келтириб чиқаришга уринаётганини билдирганлигини баён этган.
Аввалроқ Молдова бош вазири Наталья Гаврилица Кишиневнинг Украинадаги низо сабаб мамлакат чегаралари яқинида хавф даражаси ортганини таъкидлаган, бироқ мазкур таҳдидга қарши туриш мумкинлигини айтганди.
Изоҳ (0)