Кенияда қурғоқчилик туфайли 70 дан ортиқ фил нобуд бўлди

Кениядаги мамлакатнинг энг йирик миллий боғи «Саво»да кучли қурғоқчилик 78 га яқин филнинг ўлимига сабаб бўлди. Бу ҳақда Nation Africa хабар берди.

Кения Вазирлар Маҳкамасининг Туризм ва ёввойи табиат бўйича котиби Нажиб Балаланинг айтишича, филлар 2021 йил июлидан 2022 йил апрелигача бўлган вақтда нобуд бўлган.

2021 йилги рўйхатга олиш маълумотларига кўра, экотизимда 14 964 та фил бор. Вазирнинг сўзларига кўра, иқлим ўзгариши табиатни муҳофаза қилишнинг асосий муаммосига айланди, чунки ҳайвонлар қурғоқчиликдан азоб чекишда давом этмоқда.

«Биз ёввойи табиатнинг ноқонуний савдоси туфайли бир нечта филларни йўқотяпмиз, аммо иқлим ўзгариши жуда катта муаммога айланди, чунки қурғоқчилик сабаб янада кўпроқ ҳайвонлар нобуд бўлмоқда», — деди у.

Қайд этилишича, қурғоқчилик «Саво» миллий боғидаги ҳаётга таъсир кўрсатмоқда, ёввойи табиатни яқин атрофдаги ранчо ва жамоаларга кўчиб ўтишга мажбурламоқда, шунингдек, одам ва ёввойи табиат ўртасидаги қарама-қаршиликни кучайтирмоқда.

Sunday Nation томонидан ўтказилган текширув қудуқлардаги сув сатҳи пасайганини кўрсатди. Бошқа манбалар, масалан, дарёлар қуриб қолган, айрим сувлоқлар эса ифлос ёки бутунлай қуриган.

Африка ёввойи табиат фонди (АWФ) «Саво» ва Мкоманзи қўриқхоналари экологи Кен Кимитеи қурғоқчилик ёввойи табиатга катта таъсир кўрсатганини айтди. Агар инқироз давом этса, филлар сони янада камайиши мумкин, деди у.

«Иқлим ўзгариши муаммодир, чунки бир фил кунига ўртача 200 килограмм овқат ва 200 литр сув истеъмол қилади. Агар қурғоқчилик давом этса, бундан ҳам кўпроқ филларнинг ўлишини кузатамиз», — деди у ҳамда бу асосан ёш ва кекса филларга таъсир қилишини қўшимча қилди.

Нашрнинг ёзишича, қурғоқчилик хавфини юмшатиш учун ҳукумат 13 та сув омбори қуришни режалаштирган. Мамлакатнинг иқлим ўзгариши бўйича вазирлиги ҳам экотизимни ўрмонлар билан барпо этишни бошлади, у ерда иқлим ўзгариши инқирозини юмшатиш учун 200 минг дарахт экилди.