Шавкат Мирзиёев масъулларга ноёб металлар қазиб олиш ҳажмини ошириш топшириғини берди

Шавкат Мирзиёев 19 май куни геология соҳасини ривожлантириш, фойдали маъданлар ва ерости суви захираларини кенгайтиришга қаратилган лойиҳалар тақдимоти билан танишди. Бу ҳақда Президент матбуот хизмати хабар қилди.

Қайд этилишича, мамлакатда уран бўйича 27 та янги кон очилиб, барқарор хом ашё базаси яратилган. Президент соҳадаги имкониятлар бундан анча кўплиги боис нодир ва ноёб металлар қазиб олиш ҳажмини ошириш бўйича топшириқ берган.

Тақдимотда мутасаддилар шу борада ишлаб чиқилган режалар юзасидан ахборот берган. Унга кўра, умумий қиймати 182 миллион долларлик 14 лойиҳа шакллантирилган. Давлат раҳбари 2022—2026 йилларда геология-қидирув ишларини амалга ошириш бўйича алоҳида дастур ишлаб чиқиш вазифаси қўйилган. Бу дастурда 8 та янги кон ва 18 та истиқболли майдон ҳисобига уран захирасини ошириш, замонавий бурғилаш ускуналарини олиб келиш, рақамли геология моделини яратиш кўзда тутилган.

Шунингдек, «Навоиюран» давлат корхонасини трансформация қилиш, хорижий мутахассисларни жалб этиб, технологик жараёнларни такомиллаштириш бўйича кўрсатмалар берилган. Уран захирасини халқаро стандартларга мувофиқ баҳолаш, сўнгги технологиялар асосида рудадан уранни ажратиб олиш даражасини ошириш муҳимлиги қайд этилган.

Тақдимотда истиқболли конларни тайёрлаш ва уларга инвесторларни жалб қилишга оид таклиф ҳам кўриб чиқилган. Унга кўра, Ўзбекистон Тикланиш ва тараққиёт жамғармаси ҳузурида «Янги кон» лойиҳа офиси ташкил этиш, унинг устав капиталига 15 миллион доллар ажратиш мўлжалланган. Бу лойиҳа офиси литий, алюминий, магний, графит ва бошқа нодир металларни ишлаб чиқариш бўйича инвестиция лойиҳаларини амалга оширади.

Давлат раҳбари жаҳон бозорида уран нархи барқарор ўсиб бораётгани, янги лойиҳаларда бу хом ашёни қайта ишлаш ва қўшилган қиймат яратишга алоҳида эътибор қаратиш кераклигини таъкидлаган. Зарафшон, Ангрен ва Ғузордаги техникумларда геологияга ихтисослашган йўналишларни кўпайтириб, малакали ишчилар тайёрлаш зарурлиги кўрсатиб ўтилган.

Ўтган йили мамлакатда мис саноати кластери ташкил этилган. Дастурга кўра, мис ишлаб чиқаришни ягона «занжир» асосида 2 бараварга кўпайтириб, 8 миллиард долларлик маҳсулот ишлаб чиқариш режа қилинган. Тақдимотда шу борада амалга оширилаётган ишлар тўғрисида ҳам ҳисобот берилган.

Бундан ташқари, президент мутасадди ташкилотларга ерости суви захираларини кўпайтириш ва улардан оқилона фойдаланишни ташкил этиш бўйича топшириқлар берган.