Тошкент вилоятининг Пискент туманида кадастр бўлими ходимлари ер майдонларини сотган шахсларга шериклик қилгани аниқланди. Бу ҳақда Бош прокуратура ҳузуридаги департамент хабар берди.
Маълум қилинишича, «А.Г.» узумчилик ва боғдорчилик ширкатининг мурожаатига асосан ўтказилган терговга қадар текширувда, фуқаро Т.Т., Давлат кадастрлари палатасининг Олмалиқ шаҳар филиали мутахассиси А.Н. ва Пискент тумани филиали кадастр муҳандиси Б.Ш. ўзаро тил бириктириб, Пискент тумани ҳокимининг 2020—2021 йилдаги қарорига илова қилинган рўйхатни сохталаштирган.
Улар «А.Г.» ширкатига қарашли ер майдонларини фуқароларга 6-8 сотихдан 2 000 дан 15 000 долларгача сотиб, кадастр ҳужжатларини расмийлаштириш учун яна 1-2 миллион сўмдан пул олиб, 14 нафар фуқаронинг жами 562,4 миллион сўмини фирибгарлик йўли билан қўлга киритган.
Текширув давомида А.Н. ва Б.Ш. ўз айбига иқрор бўлиб, етказилган зарарни қоплаш учун 13,1 миллион сўм тақдим қилган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) ҳамда 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Маълумот учун, Кадастр агентлиги томонидан ер ва кадастр назорати йўналишида 2022 йилнинг январидан 1 майига қадар ер назоратини амалга ошириш бўйича олиб борилган назорати тадбирлари натижасида жами 6 215 та ҳолатда 2 245,6 гектар ер ўзбошимчалик билан эгаллаб олингани аниқланган.
Мавзуга доир:
- Бўстонлиқда 1,32 гектар ерни 50 минг долларга сотишга уринган уч нафар шахс ушланди
- Нукусда ярим гектар ерни 47 минг долларга расмийлаштириб беришни ваъда қилган шахслар ушланди
- Тошкент вилоятида боғдорчилик ва дала ҳовли учун ажратилган 1 гектардан ортиқ ерни 30 минг долларга сотишга уринган шахс ушланди
Изоҳ (0)