Ўзбекистонда диний эркинлик бўйча ҳалигача ҳал этилмаган ёки етарлича эътибор қаратилмаётган масалалар кўп. Бу ҳақда Олий Мажлиси Қонунчилик палатаси спикери биринчи ўринбосари, Инсон ҳуқуқлари бўйича Ўзбекистон Миллий маркази директори Акмал Саидов 19 май куни Бухоро шаҳрида «Декларациялар мулоқоти» мавзусидаги халқаро форумда айтиб ўтди.
Унинг таъкидлашича, Ўзбекистонда диний эркинликни таъминлаш масалаларига алоҳида эътибор қаратилмоқда. Бугунги кунда диний эркинлик соҳасидаги ислоҳотлар Ўзбекистонда амалга оширилаётган сиёсий-ҳуқуқий ислоҳотларнинг асосий қисмидир.
Миллатлараро тотувлик ва диний бағрикенгликни таъминлаш Янги Ўзбекистоннинг инсон ҳуқуқлари соҳасидаги асосий устувор йўналишларини бири сифатида белгиланган. Инсон ва фуқаронинг ҳуқуқлари, эркинликлари ва қонуний манфаатларини таъминлашга, Ўзбекистоннинг бирлиги ва яхлитлигини мустаҳкамлашга қаратилган Ўзбекистоннинг миллатлараро муносабатлар соҳасидаги давлат сиёсати концепцияси ҳаётга татбиқ этилмоқда.
Диний эътиқод эркинлигини мустаҳкамлаш соҳасидаги халқаро норма ва талабларни миллий қонунчиликка татбиқ этиш мақсадида халқаро ташкилотлар билан яқин ҳамкорлик йўлга қўйилган.
«Виждон эркинлигини таъминлаш соҳасидаги ҳамкорлик нафақат халқаро ташкилотлар, балки мамлакат миқёсида, жумладан, хорижий давлат институтлари ва фуқаролик жамияти орқали ҳам амалга оширилади. Мамлакатимизда амалга оширилаётган салмоқли ишларга қарамай, ҳалигача ҳал этилмаган ёки етарлича эътибор қаратилмаётган масалалар кўп», — деган Инсон ҳуқуқлари бўйича Ўзбекистон Миллий маркази директори.
Шунингдек, кўп миллатлилик шароитида маънавий-диний тикланиш соҳасидаги энг муҳим муаммолардан бирини келтириб ўтган.
«Жамиятни маънавий-ахлоқий янгилашнинг муҳим омили диний таълим ва маърифатдир. Шу билан бирга, кўп миллатлилик шароитида маънавий-диний тикланиш соҳасидаги энг муҳим муаммолардан бири диний таълим жараёнини йўлга қўйиш, имом-хатиблар ва руҳонийлар малакасини оширишдир», — деган Акмал Саидов.
Тадбирда форумда таниқли диншунос олимлар ва илоҳиёцҳунослар — Бутунжаҳон мусулмонлар лигаси (КСА) бош котибининг махсус элчиси Абдул Азиз Сархон, АҚШ Халқаро эътиқод эркинлиги бўйича комиссияси раиси Надин Майенза, Аргунгау (Нигерия) амирлиги амири ал-Ҳожи Самоил Муҳаммад Мер, Индонезия Фанлар академияси Маданият ишлари бўйича комиссияси раиси Амин Абдуллоҳ каби нуфузли меҳмонлар иштирок этган.
Изоҳ (0)