«Ғалла эркинлаштирилиши нархларнинг кескин ошишига олиб келмайди» — Иқтисодий тараққиёт ва камбағалликни қисқартириш вазирлиги

Ғалла эркинлаштирилиши нархларнинг кескин ошишига олиб келмайди. Бу ҳақда Иқтисодий тараққиёт ва камбағалликни қисқартириш вазирлиги бошқарма бошлиғи Акром Мўминов «Дарё» мухбири билан суҳбатда айтиб ўтди.

Унинг айтишича, қишлоқ хўжалиги соҳасидаги ислоҳотларнинг навбатдаги босқичи — ғалла бозорини эркинлаштириш билан бошланди.

Бундай шароитда ички бозорда ун ва нон нархлари қанчалик ўзгаради деган савол кўпчиликда бор. Ушбу шароитда бир нарсани аниқ айтиш мумкинки, ички бозоримиздаги 70-80 фоиз нарх бозор нархларида шаклланган нархлар. Биз ғалланинг нархини эркинлаштирсак ҳам, эркинлаштирмасак ҳам талаб ва таклиф асосида шаклланган нарх. Ғалла эркинлаштирилиши нархларнинг кескин ошишига олиб келмайди.

Иккинчи масала бор, бу асосан Тошкент шаҳри ва ҳудудларда истеъмол қилинадиган қолипли нон нархи бўйича. Қолипли нон нархи ҳозир ҳам эркинлаштирилган. Биз давлат томонидан қатъий нарх белгилаш амалиётидан воз кечганмиз. Бозор ислоҳотларини амалга оширишда бу нарсаларга чек қўйилган. Агар нон нархида ўсиш кузатилган тақдирда ҳам тегишли вазирлик ва идоралар томонидан бундай ҳолатда аҳолини ижтимоий ҳимояга муҳтож қисмини қандай ҳимоя қиламиз, деган механизмлари устида ишлаяпмиз. Бу бўйича алоҳида меъёрий ҳужжат лойиҳалари тайёрланяпти. Биз ҳақиқатда бозор ислоҳотларини жорий қилмоқчи бўлсак қайсидир нархни давлат томонидан белгилаш амалиётидан тўлиқ воз кечишимиз керак. Биз бозор ислоҳотларини хоҳлаяпмизми, демак ҳамма ислоҳотлар аниқ бозор механизмлари — талаб, таклиф, рақобат асосида шаклланиши керак. Нон нархларини ўзгаришларини салбий оқибатларини камайтириш бўйича аниқ механизмлар ишлаб чиқилади.

Акром Мўминов, Иқтисодий тараққиёт ва камбағалликни қисқартириш вазирлиги бошқарма бошлиғи