Қибрайда фуқаро ва банк масъул ходими 1 млрд сўм кредит маблағини талон-торож қилди

Тошкент ва Сурхондарё вилоятларида кредит маблағи эвазига харид қилинган жиҳоз ва ускуналар сотиб юборилгани аниқланди. Бу ҳақда Иқтисодий жиноятларга қарши курашиш департаменти хабар қилди.

Қайд этилишича, Бош прокуратура ҳузуридаги департаментнинг Узун туман бўлими томонидан АТБ «Микрокредитбанк» Узун филиалининг мурожаатига асосан терговга қадар текширув ўтказилган. Унда «А.С.» оилавий корхонаси ва «Ч.С.» МЧЖ норасмий раҳбарлари Й.Э. ва О.Т. ўзаро тил бириктириб, автосервис хизмати ва мебель ишлаб чиқаришни ташкил этиш учун банк филиалидан жами 450 миллион сўм имтиёзли кредит ажратилишига эришиб, талон-торож қилгани аниқланган. Шунингдек, банк филиали масъул шахслари аслида олиб келинмаган жиҳозларни олиб келингани ҳақида дастлабки мониторинг далолатномаларни тузган. Оқибатда кредит маблағлари ўз вақтида қайтарилмасдан банк манфаатларига жуда кўп миқдорда зарар етказилган. Текширув давомида етказилган зарарнинг 30 миллион сўми ундирилиши таъминланган.

Денов туман бўлими томонидан ҳам терговга қадар текширув ўтказилган. Унда аниқланишича, «А.С.» хусусий корхонаси раҳбари А.Т. нон ва нон маҳсулотлари ишлаб чиқариш соҳасини ривожлантириш учун ҳудудий банк филиалидан 300 миллион сўм имтиёзли кредит ажратишга эришган. Маблағ эвазига харид қилинган ишлаб чиқариш ускуналарини сотиб юбориб, талон-торож қилгани аниқланган.

Бундан ташқари, Қибрай туман бўлими томонидан ўтказилган терговга қадар текширувда, «И.Г.» МЧЖни норасмий бошқариб келган «Ш.Ж.» АТБ «Микрокредитбанк» Тошкент вилояти филиали кредит бўлими бошлиғи Ў.М. билан ўзаро тил бириктиргани аниқланган. Улар МЧЖ раҳбари Ш.нинг хабардорлигисиз қалбаки ҳужжатлар асосида ушбу банк филиалидан айланма маблағларни тўлдириш учун 1 миллиард сўм кредит ажратилишига эришиб, кредит маблағини талон-торож қилиб, банк манфаатларига жуда кўп миқдорда зарар етказган.

Ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 189-моддаси (савдо ёки хизмат кўрсатиш қоидаларини бузиш) ва 205-моддаси (ҳокимият ёки мансаб ваколатини суиистеъмол қилиш) билан жиноят ишлари қўзғатилган. Ҳозирда тергов ҳаракатлари ўтказилмоқда.