14 май куни Олий Мажлис Сенатининг Оролбўйи минтақасини ривожлантириш масалалари ва экология қўмитасининг мажлиси бўлиб ўтди. Бу ҳақда парламент юқори палатаси матбуот хизмати хабар берди.
Унда иқлим ўзгаришининг Ўзбекистондаги оқибатларини юмшатиш бўйича қисқа ва ўрта муддатли чора-тадбирларни амалга ошириш режасида белгиланган вазифалар бажарилиши ҳолати юзасидан «Ўзгидромет» хизмати маркази Бош директорининг ахбороти эшитилган.
Қайд этилишича, иқлим ўзгаришининг салбий оқибатлари глобал миқёсга эга бўлиб, Ўзбекистон ҳудудида ҳам яққол намоён бўлмоқда. Биргина Орол денгизи фалокати натижасида Марказий Осиёда иқлим ўзгариши дунё кўрсаткичларидан 2 баробар жадалроқ кечмоқда. Дарёлар сувини шакллантирувчи музликларни тобора эриб бориши, чанг бўронлари даврийлиги ва уларнинг ортиб бориши, ерларнинг деградацияга учраши, сув ресурсларининг тақчиллиги каби салбий кўринишларда намоён бўлмоқда.
Иқтисодиёт тармоқлари, қурилиш ва энергия тежамкорлигини ошириш юзасидан қабул қилинган стратегик дастурлар ва уларни ижроси «Ўзгидромет» томонидан ҳисоб-китоблар ва тадқиқотлар асосида таҳлил қилинган. Натижада, Ўзбекистон Иқлим бўйича Париж келишуви доирасида 2030 йилга ялпи ички маҳсулотга нисбатан иссиқхона газлари улушини 35 фоиз камайтиришга эришилади.
Шунингдек, Иқлим ўзгаришининг Ўзбекистондаги оқибатларини юмшатиш бўйича чора-тадбирлар режаси киритилган 51 та тадбирдан ҳозирда 16 таси тўлиқ бажарилган. Қолган вазифалар ижроси амалга оширилмоқда. Жумладан, ўрмон хўжаликлари томонидан 700 гектардан ортиқ майдонда ниҳолхона ва кўчатхоналар ташкил этилган. Чорвоқ сув омбори юқори қисмида 66 гектар майдонда ёнғоқ ва бодом дарахт турларидан ўрмонзорлар барпо этилган. Шунингдек, қишлоқ хўжалиги ерларида шамол ва сув эрозиясидан ҳимоя қилиш учун 500 гектарда иҳота дарахтзорлари ташкил этилган.
Инновацион ривожланиш вазирлиги томонидан қиймати 993 миллион сўмлик лойиҳа, шунингдек, Орол денгизининг қуриган тубида тупроқ шўрланиши ва иқлим ўзгаришига қарши инновацион технологияларни ишлаб чиқиш ҳамда Оролбўйи минтақаси шўрланган ерларида экологик ҳолатни яхшилашга қаратилган 664,2 миллион сўмлик 2 та стартап лойиҳа молиялаштирилган.
Бундан ташқари, соҳада қайта тикланувчи энергия манбаларидан самарали фойдаланиш мақсадида ҳам қатор ишлар амалга оширилмоқда. Жумладан, 2021 йилда Навоий вилоятида қуввати 100 МВт бўлган қуёш фотоэлектр станцияси ишга туширилган. Қорақалпоғистонда 100 МВт қувватли янги шамол электр станцияси қурилиши бошланган.
Мажлисда амалга оширилган ишлар билан бир қаторда вазирликлар ва идоралар томонидан қисқа ва ўрта муддатли чора-тадбирларни амалга ошириш режасида белгиланган айрим тадбирларни бажарилишида сусткашликларга йўл қўйилгани қайд этилган. Хусусан, Ўзбекистоннинг «яшил» иқтисодиётга ўтиш стратегиясини амалга ошириш тўғрисидаги 2022-2030 йилларга мўлжалланган узоқ муддатли ҳаракатлар режаси лойиҳасини ишлаб чиқиш ишлари охирига етказилмаган.
Бундан ташқари, қайта тикланадиган ва водород энергетикасини ривожлантириш ҳамда ёқилғи-энергетика тармоғидаги иссиқхона газлар ажратмаларини камайтириш имкониятларини ўрганиш борасидаги ишлар ҳам охирига етказилмаган. Шунингдек, иқлим шароитларини ҳисобга олган ҳолда қурилишда техник нормативларни қайта кўриб чиқиш «Янги қурилиш қоидалари»ни тасдиқлаш тадбири якунланмаган.
Сенаторлар томонидан ўз вақтида бажарилмаган вазифаларни охирига етказиш ва бошқа масалалар юзасидан масъулларга топшириқ, тегишли таклиф ва тавсиялар берилган. Хусусан, «Ўзбекистон Республикаси шамол атласи»ни ҳамда «Ўзбекистон Республикаси қуёш атласи»ни ишлаб чиқиш шулар жумласидандир.
Мажлисда муҳокама этилган масала юзасидан қўмитанинг тегишли қарори қабул қилинган.
Аввалроқ Орол денгизи тубидан кўтариладиган қум ва чанг бўронлари ҳар йили қанча иқтисодий зарар келтириши, Орол денгизининг қуриган тубида ўрмонзорлар барпо этилиши тўғрисида хабар берилганди.
Изоҳ (0)