Хоразм вилоятининг Боғот туманида валюта маблағларининг ноқонуний айирбошлаш ҳолатининг олди олинди, деб хабар беради Бош прокуратура ҳузуридаги департамент.
Маълум қилинишича, департаментнинг Хоразм вилояти бошқармаси томонидан тезкор тадбир ўтказилган. Тадбирда А.С. ва М.Ж. исмли шахслар ўзаро тил бириктириб, фуқаро Ф.Ж.га ҳар бир АҚШ долларини 11 230 сўмдан сотишга келишиб, жами 6,8 минг долларни 76,3 миллион сўмга сотган вақтида ушланган. Улардан 7 минг доллар, 13,5 минг Россия рубли ва 1,6 миллион сўм ашёвий далил тариқасида олинган.
Мазкур ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Наманганда 5,4 минг долларни ноқонуний сотишга уринган шахслар ушлангани, Ўзбекистонда валютани ноқонуний сотиб олиш ва сотганлик учун жазо юмшатилгани тўғрисида хабар берилганди.
Изоҳ (0)