Наманган вилояти ҳокими Шавкат Абдураззақов бошчилигидаги делегация Австрияда Атом энергияси бўйича халқаро агентлик (МАГАТЭ) бош директор ўринбосари Лю Хуа билан учрашди. Бу ҳақда «Дарё» мухбири Азизбек Абдувалиев хабар бермоқда.
Вилоятда агентлик билан ҳамкорликда қўшма лойиҳалар амалга ошириб келинмоқда. Жумладан, Намангандаги онкология шифохонасига замонавий гамма-нур терапия ускунаси олиб келиб ўрнатилган бўлиб, тез орада ишга туширилади. Шавкат Абдураззақов бу соҳадаги амалий ҳамкорлик учун ташкилот раҳбариятига миннатдорлик билдирди.
Учрашув давомида Наманган вилоятини тиббиёт марказига айлантириш имкониятлари, хусусан, минтақада илк позитрон-эмиссион томография жиҳози олиб келиб ўрнатиш ва ишга тушириш бўйича музокаралар ўтказилди. Тиббиётни ривожлантириш йўлида ўзаро ҳамкорликни янада кенгайтириш борасида келишиб олинди.
Наманган делегацияси Венада ОПЭК жамғармаси бош директори ўринбосари Фуад Альбассам билан ҳам учрашди.
Мулоқотда умумий қиймати 68 миллион долларни ташкил этувчи Заркент, Хадикент, Исковот, Булоқбоши, Ёшлик аҳоли пунктларини ичимлик сув таъминотини яхшилаш лойиҳасига жамғарманинг 53,96 миллион доллар миқдоридаги имтиёзли кредитини жалб этиш бўйича музокаралар олиб борилди.
Изоҳ (0)