Аввалроқ Россиянинг «Магнит Косметик» дўконлар тармоғи Ўзбекистон бозорига киргани ҳақида хабар берилган эди. Бу Ўзбекистондаги биринчи дрогери дўкони эмас. Бу қандай формат ва у бошқалардан фарқи нимада —«Дарё» шарҳида.
Сўнгги йилларда Ўзбекистонда дрогери сегменти ривожлана бошлади. Дрогери немис тилидан таржима қилинганда «Дорихона дўкони» маъносини беради.
1970 йилларда Германияда тез «кетадиган» товарлар сотуви билан шуғулланадиган савдо нуқталари пайдо бўлди. Бугун ушбу мамлакатда уларнинг сони қарийб 10 мингни ташкил этади.
Катта дрогери тармоқлари кўп миллиард айланма маблағли операцияларни амалга оширади. Буюк Британияда бу Boots, Германияда – Rossman, Жанубий Кореяда – Olive Young каби ном остида фаолият юритади.
Дрогери – уй олдидаги дўконлар бўлиб, улар кундалик эҳтиёжга эга бўлган ноозиқ-овқат товарларини таклиф этади. Масалан, улар косметика, маиший кимё, гигиена воситалари, уй-жойларни тозалаш товарлари ва бошқалар бўлиши мумкин.
Ғарбда эса ассортиментни дорилар ҳамда биологик фаол озуқавий қўшимчалар тўлдиради. «Уй олдидаги дўконлар»дан фарқли ўлароқ, фақат яроқлилик муддати узоқ ва сақлаш учун алоҳида шароит талаб этилмайдиган озиқ-овқат товарлари — чипс, печенье, қайла кабиларни сотишга йўл қўйилади.
Ўзбекистонда дрогери бозорининг ҳозирги ҳолати
2015 йилда очилган Bellstor Ўзбекистондаги биринчи дрогери дўкони саналади. 2022 йилга келиб, тармоқ нуқталари 11 тага етди. Дўконларнинг катта қисми йирик савдо марказлари ҳамда марказий туманлардан жой олди.
Ўзбекистонда хорижий ритейлерларнинг фаоллашуви билан дрогери формати тобора классик форматга айланиб бормоқда. Масалан, яқин кунларда пайдо бўлган, ассортиментининг каттагина қисми дрогери-сегментига тўғри келадиган Fix Price ва косметика ҳамда маиший кимё маҳсулотларини таклиф қилувчи «Беларусь косметикаси» дўконлари Тошкентнинг аҳоли зич яшайдиган туманларида жойлашган.
Кўпчилик Ўзбекистонда дрогерилар ҳам хўжалик молларини, ҳам озиқ-овқат сотадиган уй яқинидаги анъанавий дўкончалар билан рақобатлашади, деб ҳисоблайди. Дрогериларда, одатда, озиқ-овқат маҳсулотлари бўлмайди. Лекин экспертлар бу форматдаги савдо нуқталарининг салоҳиятини юқори деб ҳисоблайди.
Хорижий ритейлерлар Ўзбекистоннинг ўзига жалб қиладиган жиҳатлари сифатида аҳоли сонининг кўплиги, ЯИМ ўсиш суратларининг тезлиги ҳамда жамиятнинг иқтисодий фаол қисми ҳисобланадиган ёшлар улушининг юқорилигини таъкидлайди.
Ўзбекистон аҳолининг юқори зичлиги билан ҳам ажралиб туради. Россия ва Қозоғистондан фарқли ўлароқ, шаҳарлар ўртасидаги масофа унчалик ҳам узоқ эмас. Бу бутун республика бўйлаб дрогери-тармоқларини ёймоқчи бўлаётганларга самарали логистика тузиш имконини беради. Ҳозирда хориж бизнеси дастлабки қадамларини қўймоқда. Агар очилган савдо нуқталари фойда келтирадиган бўлса, Ўзбекистонни қўшимча инвестициялар кутади.
Дрогериларнинг уй олдидаги анъанавий савдо нуқталари билан рақобати унчалик муҳим бўлмайди: харидорлар икковига ҳам кираверади. Одамлар одатий дўконлардан маҳсулот сотиб олишда давом этади. Дрогери тармоқларига эса косметика ва хўжалик молларининг анча кенгроқ ассортименти, яхши мижоз тажрибаси ва яхшироқ сервис учун кирадиган бўлади.
Масалан, АҚШ, Европа ва Россияда аҳоли мунтазам тарзда дрогерилардан харид қилади. Дўконга ташриф фақат маиший эҳтиёжлар учун товарлар сотиб олиш зарурияти билангина эмас, балки аксарият ҳолларда кўриб, завқ олиш мақсадида ҳам кириши кузатилади.
Изоҳ (0)