Avvalroq Rossiyaning “Magnit Kosmetik” do‘konlar tarmog‘i O‘zbekiston bozoriga kirgani haqida xabar berilgan edi. Bu O‘zbekistondagi birinchi drogeri do‘koni emas. Bu qanday format va u boshqalardan farqi nimada —“Daryo” sharhida.
So‘nggi yillarda O‘zbekistonda drogeri segmenti rivojlana boshladi. Drogeri nemis tilidan tarjima qilinganda “Dorixona do‘koni” ma’nosini beradi.
1970-yillarda Germaniyada tez “ketadigan” tovarlar sotuvi bilan shug‘ullanadigan savdo nuqtalari paydo bo‘ldi. Bugun ushbu mamlakatda ularning soni qariyb 10 mingni tashkil etadi.
Katta drogeri tarmoqlari ko‘p milliard aylanma mablag‘li operatsiyalarni amalga oshiradi. Buyuk Britaniyada bu Boots, Germaniyada – Rossman, Janubiy Koreyada – Olive Young kabi nom ostida faoliyat yuritadi.
Drogeri – uy oldidagi do‘konlar bo‘lib, ular kundalik ehtiyojga ega bo‘lgan nooziq-ovqat tovarlarini taklif etadi. Masalan, ular kosmetika, maishiy kimyo, gigiyena vositalari, uy-joylarni tozalash tovarlari va boshqalar bo‘lishi mumkin.
G‘arbda esa assortimentni dorilar hamda biologik faol ozuqaviy qo‘shimchalar to‘ldiradi. “Uy oldidagi do‘konlar”dan farqli o‘laroq, faqat yaroqlilik muddati uzoq va saqlash uchun alohida sharoit talab etilmaydigan oziq-ovqat tovarlari — chips, pechenye, qayla kabilarni sotishga yo‘l qo‘yiladi.
O‘zbekistonda drogeri bozorining hozirgi holati
2015-yilda ochilgan Bellstor O‘zbekistondagi birinchi drogeri do‘koni sanaladi. 2022-yilga kelib, tarmoq nuqtalari 11 taga yetdi. Do‘konlarning katta qismi yirik savdo markazlari hamda markaziy tumanlardan joy oldi.
O‘zbekistonda xorijiy riteylerlarning faollashuvi bilan drogeri formati tobora klassik formatga aylanib bormoqda. Masalan, yaqin kunlarda paydo bo‘lgan, assortimentining kattagina qismi drogeri-segmentiga to‘g‘ri keladigan Fix Price va kosmetika hamda maishiy kimyo mahsulotlarini taklif qiluvchi “Belarus kosmetikasi” do‘konlari Toshkentning aholi zich yashaydigan tumanlarida joylashgan.
Ko‘pchilik O‘zbekistonda drogerilar ham xo‘jalik mollarini, ham oziq-ovqat sotadigan uy yaqinidagi an’anaviy do‘konchalar bilan raqobatlashadi, deb hisoblaydi. Drogerilarda, odatda, oziq-ovqat mahsulotlari bo‘lmaydi. Lekin ekspertlar bu formatdagi savdo nuqtalarining salohiyatini yuqori deb hisoblaydi.
Xorijiy riteylerlar O‘zbekistonning o‘ziga jalb qiladigan jihatlari sifatida aholi sonining ko‘pligi, YaIM o‘sish suratlarining tezligi hamda jamiyatning iqtisodiy faol qismi hisoblanadigan yoshlar ulushining yuqoriligini ta’kidlaydi.
O‘zbekiston aholining yuqori zichligi bilan ham ajralib turadi. Rossiya va Qozog‘istondan farqli o‘laroq, shaharlar o‘rtasidagi masofa unchalik ham uzoq emas. Bu butun respublika bo‘ylab drogeri-tarmoqlarini yoymoqchi bo‘layotganlarga samarali logistika tuzish imkonini beradi. Hozirda xorij biznesi dastlabki qadamlarini qo‘ymoqda. Agar ochilgan savdo nuqtalari foyda keltiradigan bo’lsa, O‘zbekistonni qo‘shimcha investitsiyalar kutadi.
Drogerilarning uy oldidagi an’anaviy savdo nuqtalari bilan raqobati unchalik muhim bo‘lmaydi: xaridorlar ikkoviga ham kiraveradi. Odamlar odatiy do‘konlardan mahsulot sotib olishda davom etadi. Drogeri tarmoqlariga esa kosmetika va xo‘jalik mollarining ancha kengroq assortimenti, yaxshi mijoz tajribasi va yaxshiroq servis uchun kiradigan bo‘ladi.
Masalan, AQSh, Yevropa va Rossiyada aholi muntazam tarzda drogerilardan xarid qiladi. Do‘konga tashrif faqat maishiy ehtiyojlar uchun tovarlar sotib olish zaruriyati bilangina emas, balki aksariyat hollarda ko‘rib, zavq olish maqsadida ham kirishi kuzatiladi.
Izoh (0)