IT Park 20 ёшида ойига 1000 доллар топадиган самарқандлик йигит ҳақида ҳикоя қилди

IT Park 20 ёшли Достон Ишановнинг соҳадаги муваффақиятлари тўғрисидаги ҳикояни тақдим этди.

Ҳикоя қаҳрамони асли самарқандлик Достон Ишанов. У 20 ёш бўлишига қарамай, бир нечта муваффақиятли стартапларни амалга оширган.

Достон IT-соҳасига 2021 йилда робототехника бўйича курсларни ўрганиш учун Самарқанд вилояти IT Park филиалига борган. Уч ой ўтгач эса у ўзининг илк стартап лойиҳасини ишга туширган.

Ёш мутахассиснинг тиришқоқлиги ва меҳнатсеварлиги эътибордан четда қолмади: робототехника асосларини ўрганишга киришганидан олти ой ўтгач, «Ўзбекистон учун 100 ғоя» танловида ўз лойиҳаси билан иштирок этиб, топ-10 таликка кирган.

Ҳозирда Достон Хитойда онлайн форматда таҳсил олиш билан биргаликда IT Park Самарқанд филиалида робототехника бўйича дарс бермоқда. Ёш мураббийнинг 50 нафар шогирди бор.

Достон IT Park Самарқанд филиалида ишлаган вақтида 2021 йил февраль ойида S.W.А.Т group (Smart World Accyess Technology) лойиҳасини ишга туширди ва унинг раҳбарига айланган.

14 кишидан иборат жамоа айни пайтда ахборот технологиялари, робототехника, мехатроника, схемотехника, дастурлаш ва 3D моделлаштириш йўналишларида янги стартап лойиҳалар устида ишламоқда.

Жамоа томонидан амалга оширилган лойиҳалар қаторига «Алкотестер», «Юқори технологиялар музейи», «Utility SS99 робот», «Ақлли ҳасса», «Аrm Robot», «Газ детектори», «Гид робот», «Робот лаб», «Сувости роботи», «I.B.K. uz», «Women Union» ва бошқа кўплаб лойиҳалар киради.

Достон халқаро Singapore АUV Challenge’да иштирок этиш арафасида ва ҳозирда ўз лойиҳаси устида ишламоқда. Бундан ташқари, у Туркияда бўлиб ўтадиган Technofest-2022 халқаро танловида ҳам қатнашади.

Достон ҳам мураббий сифатида, ҳам ўз лойиҳалари устида астойдил тер тўкмоқда. Бугунги кунда у ойига 1000 доллар атрофида пул топади.

Аввалроқ IT-Park халқаро IT-сертификатларини олиш учун харажатларни қоплаб бериши ҳақида хабар берилган эди.