Олмалиқ кон-металлургия комбинати бирламчи жойлаштиришга (IPO) тайёрланмоқда. У 2022 йилнинг ноябрь ойида бўлиб ўтиши кутилмоқда.
IPO нима ва у оддий одамларга нима беради?
IPO (Initial Public Offering) — бирламчи оммавий таклиф, акцияларни фонд бозори орқали сотиш жараёни. Бу корхона учун нафақат пул жалб қилиш, балки янги босқичга кўтарилиб, оммавий ва шаффоф бўлиш йўли дир. IPO’дан кейин деярли барча нарса ўзгаради — ҳисобот шаклларидан тортиб ривожланиш режаларигача.
IPO ўтказиш — хусусийлаштириш усулларидан бири. Сўнгги йилларда ҳукумат компанияларни кимошди савдоси ва аризалар қабул қилиш йўли билан сотиш орқали иқтисодиётдаги иштирокини камайтиришга ҳаракат қилмоқда.
Оддий одамлар учун бу йирик компаниянинг маълум бир қисмининг эгаси бўлиш ва фойданинг бир қисмини олиш имкониятидир.
ОКМК муваффақиятли компания. 2021 йил якунига кўра комбинат 5,3 триллион сўм соф фойда кўрган – бу давлат иштирокидаги корхоналар орасида иккинчи кўрсаткичдир (фақат НКМКда кўпроқ бўлди — 10,6 триллион сўм).
IPO вақтида компания акцияларини кимлар сотиб олиши мумкин?
Исталган киши. Мисол учун, «Кварц» IPO’си вақтида 3305 киши компаниянинг янги акциядорларига айланган.
Акцияларнинг катта қисмини ушбу корхона жойлашган Фарғона вилояти аҳолиси сотиб олган. Улар умумий қиймати 5 млрд сўмдан ортиқ 1,7 миллионта қимматли қоғозларни харид қилган.
Тошкент иккинчи ўринни эгаллаган — ўшанда пойтахтликлар томонидан салкам 2 млрд сўмга 655 минг акция қоғозлари сотиб олинган.
Харид қилиш биржада брокерлар орқали амалга оширилади. Сотувга қўйишдан аввал компания одатда road-show уюштириб, ўзи ҳақида, шунингдек, ютуқлари, муваффақиятлари ва режалари тўғрисида ҳикоя қилиб бериш асносидаги бир қатор саёҳатлар ва тадбирларни ўтказади. Бундай тадбирлар давомида акцияларни сотиб олишга ариза топшириш ҳам мумкин.
Акцияларни нима қилса бўлади?
IPO’да компания акцияларини сотиб олган шахс акциядорга айланиб, компания улушига эгалик қилади. У дивидендлар (компания фойдасининг бир қисми) олиш ҳуқуқига эга бўлади.
Бироқ масаланинг бошқа жиҳатини ҳам кўздан қочирмаслик керак. Аризаларни йиғиш жараёнида обуналар сони ошиб кетиши мумкин — бу вазият акцияларга бўлган талаб таклифдан кўра ортиб кетганлигини англатади. У ҳолда қимматли қоғозлар нархи ҳам ошиши мумкин.
Мурожаатлар кўплиги сабабли брокер ариза қаноатлантира олмаслиги ёки қисман қаноатлантира олмаслиги эҳтимоли мавжуд.
Бундан ташқари, акцияларни IPO босқичида сотиб олиш хавфнинг ошиши билан боғлиқ. Компания томонидан жойлаштиришдан аввал белгиланган акция нархи жуда юқори бўлиб чиқиши мумкин — очиқ савдо бошланганидан сўнг сезиларли даражада тушади.
Ушбу пасайишдан кейин ўсиш кузатилиши ёки кузатилмаслиги компаниянинг кейинги ҳаракатларига ва ўз фаолиятини қандай олиб боришига боғлиқ.
Аввалроқ UzAuto Motors’нинг биринчи IPO’си қачон ўтказилиши маълум бўлган эди.
Изоҳ (0)