АҚШ бошқа давлат банкларини Россияга санкцияларни четлаб ўтишда ёрдам беришдан огоҳлантирди

Байден маъмурияти халқаро банкларни Россияга санкциялардан қочишга ёрдам бермасликка чақирди. Бу ҳақда New York Times хабар бермоқда.

Агар фирмалар Украинадаги уруш натижасида молиявий чекловларга дуч келган россиялик тадбиркорлар ёки олигархларни қўллаб-қувватласа, АҚШ ва Европа бозорларига кириш имкониятини йўқотиши мумкин.

Бу огоҳлантириш АҚШнинг ўз молиявий кучи орқали Россия иқтисодиётига босим ўтказишга қаратилган саъй-ҳаракатлардан бири бўлиши мумкин.

Байден маъмурияти Россияни жаҳон иқтисодиётидан ажратиб қўйиш учун санкцияларни қўллаш қобилиятидан фойдаланмоқда.

13 май куни Нью-Йоркдаги халқаро банклар вакиллари билан шахсий учрашувларда Ғазначилик котиби ўринбосари Адевале Адеемо россияликларга санкцияларни бузишда ёрдам бериш оқибатларини айтиб ўтди.

У молиявий муассаса Россияга нисбатан санкциялар қўлламаган давлатда жойлашган бўлса ҳам, компания АҚШ ёки Европа чекловларини бузганлик учун оқибатларга дуч келишига ишора қилди.

Агар сиз санкцияга учраган шахсга моддий ёрдам берсангиз, биз сизга нисбатан ҳам чекловлар режимини қўллашимиз мумкин, — деди Адеемо жума куни берган интервьюсида.

Байден маъмурияти Россия молия институтлари, олигархлари ва унинг Марказий банкига кенг қамровли чекловлар жорий қилган.

Халқаро банкирлар институти мезбонлик қилган йиғилишда Хитой, Бразилия, Ирландия, Япония ва Канаданинг молия институтлари иштирок этди.

Адеемонинг айтишича, АҚШ банклари Америка санкцияларини бузишдан эҳтиёт бўлишмоқда, бироқ россиялик жисмоний шахслар ва тадбиркорлар вақтинчалик ечим сифатида прокси-серверлардан фойдаланишга интилмоқда.

Ўз яхталарини мусодара қилинмаслиги учун турли портларга кўчиришга уринаётган санкцияга учраган олигархларга ёрдам беришга уринаётган фирмалар ҳам огоҳлантирилди.

Аксарият ҳукуматлар санкцияларга амал қилмоқда, аммо БАА каби давлатлар Россия активлари учун хавфсиз бошпана беришда давом этмоқда. Бир нечта россиялик олигархларнинг яхталари Дубайга олиб борилган.

Россия яхталари портлардан, санкцияларни кенгайтирмаган мамлакатларга кўчирилди. Биз одамларга шуни тушунтирмоқчимизки, ушбу яхталардан бирига моддий ёрдам кўрсатаётган ҳар қандай бизнес санкцияларга учраши мумкин, — деди Адеемо.

Дунё бўйлаб банклар ва молия институтлари Россияга қарши янги санкциялар тўлқинларига қандай риоя қилиш кераклиги билан курашмоқда.

Аввалроқ Оқ уй Россияга қарши санкциялар кенгайтирилиши мумкинлигини маълум қилгани ҳақида хабар берилган эди.