Гулнора Каримовага тегишли бўлган «Сижжак» оромгоҳини сотиб олишга бирорта ҳам ариза келиб тушмагани маълум бўлди

Аввалроқ «Сижжак» оромгоҳи онлайн-аукционга қўйилгани ҳақида хабар берилган эди.

Жараён икки босқичдан иборат — аввал ариза берувчилар танланади, сўнгра тижорат таклифлари баҳоланади. Потенциал харидорлар дам олиш зонасини ривожлантириш бўйича бизнес концепциясини тақдим этишлари керак.

Аризалар қабул қилиш муддати бир ой давом этиб, 11 майда якунланди. Катта қизиқишга қарамай, бирорта ҳам ариза келиб тушмаган. Энди «Сижжак» қайта савдога қўйилиши кутилмоқда.

Оромгоҳ Ўзбекистон Биринчи Президенти Ислом Каримовнинг тўнғич қизи Гулнора Каримовага тегишли. 2017 йилда Жиноят ишлари бўйича Тошкент вилояти суди ажрими билан мусодара этилган.

Кейинчалик мусодара қилинган ушбу ҳашаматли қароргоҳ ичидаги барча жиҳозлари билан Ўзбекистон Триатлон федерациясига вақтинчалик фойдаланишга берилган эди.

Аммо охир-оқибат ушбу дам олиш масканини оммавий савдолар орқали шаффофлик принципи асосида сотувга қўйишга қарор қилинди.

2021 йилда дам олиш маскани бир неча бор сотувга қўйилган эди, бироқ харидор топилмаган.

Айни пайтда Давлат активларини бошқариш агентлиги тасарруфидаги мазкур мажмуанинг умумий ер майдони бино ва иншоотлари билан биргаликда 5,38 гектарни ташкил этади. Оромгоҳда меҳмонхона, бир нечта ҳовуз, амфитеатр, коттеж ва бошқа иншоотлар мавжуд.

Аввалроқ «Сижжак» дам олиш масканини қандай кўринишга эгалиги ҳақида хабар берилган эди.