Чилонзордаги деворга чизилган Чусовитина граффитисига юбка «кийдирилгани» ҳақида хабар берилганди. Гимнастикачи ушбу воқеага ўз муносабатини билдирди.
Сўзи аввалида спортчи ушбу граффити чизилганидан хурсанд бўлганини айтиб ўтди.
«Ҳурматли дўстларим ва мухлисларим! Мен сизнинг ҳар бирингизни чуқур қадрлайман ва ҳурмат қиламан ҳамда ҳар қандай вазиятда қўллаб-қувватловчи сўзларингизни эшитишдан жуда хурсандман. Олимпиадада қатнашиб, Япониядан қайтиб келганимдан сўнг, Чилонзор туманидаги турар жой биноларидан бирининг фасадида муаллифи @inkuzart бўлган ноодатий арт-объект пайдо бўлди. Бу мен учун, менинг чиқишларим ва тақдиримга бефарқ бўлмаган барча учун ёқимли бўлди. Биламан, бу расм катта резонансга сабаб бўлди ва юртдошларимиз томонидан жуда кўп ижобий фикрлар олди», — дейди у.
Спортчининг айтишича, аввалроқ граффитига зарар етказилган.
«Афсуски, жамиятимизда ҳали ҳам давлатимизнинг турли соҳаларида, хусусан, санъат ва спортда амалга оширилаётган бунёдкорлик ва ислоҳотларга тор фикр билан қарайдиган фуқаролар ҳам учраб турибди. Афтидан, улар учун ягона қувонч олиб келувчи нарса бу жамоат аҳамиятига эга бўлган объектларга зарар етказиш ҳисобланади. Мен расмим билан қилинган ишларни фақат вандализм деб аташим мумкин», — дейди Оксана.
Чусовитина Тошкент шаҳар ҳокимлиги зарар етказилган граффитига юбка қўшиб қўйишга мажбур бўлганини маълум қилди.
«Менга шаҳар ҳокимлигидан телефон қилиб, бўлган воқеани айтишди. Шундан сўнг ҳокимиятдагилар кийимимга юбка қўшиб, расмнинг ўзгартирилган қисмларини тузатишга қарор қилишганини маълум қилишди», — дейди спортчи.
Пости охирида граффитига зарар етказган фуқароларга ўз-ўзини ривожлантиришга интилишларини, кўпроқ мумтоз ва илмий адабиётларни ўқишларини, спорт билан шуғулланишларини ҳамда маънавий жиҳатдан юксалишларини тилаган.
Стрит-артларга қилинган «ҳужумлар»
2021 йилнинг сентябрь бошида @inkuzart Ўзбекистон автомобиль бозоридаги монополияга бағишланган стрит-арт чизганди. Унда машина учун узун навбат ва навбат бошида қизил шапкали инсон тасвирланганди. Кейинроқ ушбу тасвир тўлиқ ўчириб ташланган, пойтахт ҳокимлиги ва «Ўзавтосаноат» бу ишга алоқаси йўқлигини маълум қилган эди. Ноябрда эса кўча рассомининг Тошкентда бензин нархи ошишига бағишланган стрит-арт ўчириб ташланди. 2022 йилнинг 18 февраль куни эса Inkuzart’га тегишли турли формулалар билан деворга чизилган Алберт Эйнштейннинг портрети бўяб ташланган. Чилонзор туман ҳокимлиги стрит-артнинг ўчирилишига туман ҳокимининг буйруғи эмас, маҳалла фаоллари сабабчи бўлганини маълум қилган.
Изоҳ (0)