Намангандаги «Саховат уйи»да истиқомат қилувчи 70 ёшли икки қария турмуш қурди. Улар 35 йил давомида бир-бирига кўнгил қўйиб келган (фото ва видео)

Намангандаги «Саховат уйи»да истиқомат қилувчи икки қария турмуш қурди. Бу ҳақда «Дарё» мухбири Азизбек Абдувалиев хабар бермоқда.

Вадим Рязанов ва Роза Сой 70 ёшни қаршилади. Бу уларнинг расман биринчи турмуши. Улар 35 йил давомида бир-бирига кўнгил қўйиб келгани, лекин оила қуришлари учун имкон бўлмаганини айтади.

«Розани ўтган асрнинг 90 йилларидан бери танийман, биламан. Яхши кўрардик бир-биримизни. Ўша пайтларда уйланмоқчи ҳам бўлганман, лекин отаси рўйхушлик бермаганди. Тақдир бизни орадан шунча йил ўтиб бу ерда бир-биримизга йўлиқтирди», — дейди Вадим Рязанов.

Давлатобод туман ФҲДЁО ходимлари ушбу никоҳни қайд этиш учун «Саховат уйи»га келди. Бу ерда туман ҳокимлиги вакиллари, муассаса ходимлари, ушбу уйда истиқомат қилувчилар иштирокида ўтказилган тадбир тантана тусини олди.

Келин-куёвларга совғалар топширилди, ширинлик улашилди.

ФҲДЁО мудираси Ширин Исакованинг «Дарё»га маълум қилишича, бу туманда ёши катта инсонлар ўртасида никоҳ қайд этилиши бўйича ягона ҳолат эмас. Олдинроқ Давлатободда 87 ёшли отахон ва у кишининг шаръий никоҳдаги 64 яшар турмуш ўртоғи никоҳларини расмийлаштириш истагини билдирганди.