Namangandagi “Saxovat uyi”da istiqomat qiluvchi 70 yoshli ikki qariya turmush qurdi. Ular 35 yil davomida bir-biriga ko‘ngil qo‘yib kelgan (foto va video)

Namangandagi “Saxovat uyi”da istiqomat qiluvchi ikki qariya turmush qurdi. Bu haqda “Daryo” muxbiri Azizbek Abduvaliyev xabar bermoqda.

Vadim Ryazanov va Roza Soy 70 yoshni qarshiladi. Bu ularning rasman birinchi turmushi. Ular 35 yil davomida bir-biriga ko‘ngil qo‘yib kelgani, lekin oila qurishlari uchun imkon bo‘lmaganini aytadi.

“Rozani o‘tgan asrning 90-yillaridan beri taniyman, bilaman. Yaxshi ko‘rardik bir-birimizni. O‘sha paytlarda uylanmoqchi ham bo‘lganman, lekin otasi ro‘yxushlik bermagandi. Taqdir bizni oradan shuncha yil o‘tib bu yerda bir-birimizga yo‘liqtirdi”, — deydi Vadim Ryazanov.

Davlatobod tuman FHDYO xodimlari ushbu nikohni qayd etish uchun “Saxovat uyi”ga keldi. Bu yerda tuman hokimligi vakillari, muassasa xodimlari, ushbu uyda istiqomat qiluvchilar ishtirokida o‘tkazilgan tadbir tantana tusini oldi.

Kelin-kuyovlarga sovg‘alar topshirildi, shirinlik ulashildi.

FHDYO mudirasi Shirin Isakovaning “Daryo”ga ma’lum qilishicha, bu tumanda yoshi katta insonlar o‘rtasida nikoh qayd etilishi bo‘yicha yagona holat emas. Oldinroq Davlatobodda 87 yoshli otaxon va u kishining shar’iy nikohdagi 64 yashar turmush o‘rtog‘i nikohlarini rasmiylashtirish istagini bildirgandi.