АҚШнинг Арканзас штатида яшовчи Хейли Скоч Гарри Поттер китоблари саҳифаларидан битирув кечаси либосини яратди. Бу ҳақда «Korrespondent.net» нашри хабар берди.
Бу китоблар 18 ёшли қиз учун алоҳида аҳамиятга эга, чунки айнан ушбу китоблар ота-онаси ажрашгандан кейин Хейлининг ўзига келишига ёрдам берган.
Хейлининг сўзларига кўра, у байрамда ҳамманинг ҳайратига сабаб бўлган. Қолаверса, унга иккита кутубхона либосни кўргазмада намойиш этиш илтимоси билан мурожаат қилган.
Скоч ушбу ғояни TikTok’даги видеодан илҳомланиб олганини таъкидлади. У либосни яратиш учун тўрт кун сарфлади. Хейли китоб саҳифаларини бирма-бир ажратди, уларни худди елпиғич кўринишида букиб, бир-бирига маҳкамлади.
«Мен буни ҳақиқатан ҳам ноанъанавий бўлишини хоҳлардим ва ҳар доим Гарри Поттерга мубтало бўлганман. Шунингдек, ўқишни яхши кўраман. Шунинг учун китоблар йиғиб, улардан оқшом либосини яратишга қарор қилдим», — деди америкалик қиз ва либосни Гарри Поттер ҳақидаги фильмларни томоша қилиш жараёнида тикканини қўшимча қилди.
«Мен ҳаётидан бирозгина мўъжиза излаган уятчан, мижғов ва телбароқ қизалоқ эдим. Бу китоблар заиф ва энг муҳтож пайтимда илҳом манбаи бўлди. Мен бу китобларни жуда ҳам яхши кўраман», — дея хулоса қилди Хейли.
Изоҳ (0)