Namangandagi “Chorsu” dehqon bozorida yong‘in yuz berdi (video)

Namangan shahrida joylashgan “Chorsu” dehqon bozoridagi oshxonalarning birida yong‘in chiqdi. Bu haqda Namangan viloyati FVB matbuot xizmati xabar berdi.

Ma’lum qilinishicha, Namangan shahar FVBga “Chorsu” dehqon bozori hududidagi oshxonalardan birining yerto‘lasida yong‘in chiqqani to‘g‘risida xabar kelib tushgan.

Voqea joyiga 2 ta yong‘in-qutqaruv ekipaji yetib kelgan. Ma’lum qilinishicha, yong‘in kattaligi sabab qo‘shimcha yong‘in-qutqaruv avtomashinalari jalb etilgan.

Hozirda yong‘inni bartaraf etish choralari ko‘rilmoqda.

“Yong‘in sababi, zarari aniqlanadi va qo‘shimcha ma’lumot taqdim etiladi”, — deyiladi xabarda.

Avvalroq Toshkentdagi xonadonda telefon quvvatlash moslamasidan yong‘in chiqqani, Oltiariqdagi massajxonada yong‘in sodir bo‘lgani, Sergelidagi avtosalonda yuz bergani to‘g‘risida xabar berilgandi.