Shifokorlar Britaniya qirolichasi Yelizaveta II ga spirtli ichimliklarni muntazam iste’mol qilishdan voz kechishni va tadbirlarda ichmaslikni tavsiya qildi. Bundan qirolichaning sog‘lig‘ini saqlash va 2022-yilda o‘tkaziladigan platinum yubileyini eng yaxshi shaklda nishonlash maqsad qilingan, deb yozadi Daily Telegraph.
Foto: PA Images
Qirollik saroyidagi xabardor manbalarning ma’lum qilishicha, qirolicha bu tavsiyani jiddiy qabul qilib, spirtli ichimliklardan butunlay voz kechishga qaror qilgan, biroq ilgari ham uni ko‘p ichadi deb bo‘lmasdi. Endi u hatto sevimli “Martini” kokteyllaridan voz kechdi va faqat Malvern suvini ichmoqda, bu uning shaxsiy tanlovi, deya qo‘shimcha qildi manbalar.
Shu bilan birga, 95 yoshli qirolicha grafikka muvofiq mamlakat bo‘ylab faol safar qilish va tadbirlarda qatnashishda davom etmoqda.
Mish-mishlarga ko‘ra, qirolicha uyda tushlik paytida dubonnet kokteyli bilan jin, kechki ovqatdan oldin esa jin va martini aralashmasini ichishni yaxshi ko‘rardi. Odatda ichimliklarni qirolichaning turmush o‘rtog‘i, Edinburg gersogi Filipp aralashtirgan, uning o‘zi pivoni afzal ko‘rardi. Nashr manbasi, shahzodaning vafotidan keyin, o‘nlab yillar davomida ikki kishi bo‘lib ichishga odatlanib qolingan kokteyllar Yelizavetaning o‘ziga ortiq zavq bag‘ishlamasligi mumkin, deb taxmin qildi.
Bundan tashqari, qirolicha bir stakan Reyn vinosi yoki qizil vino ichishi mumkin edi, lekin u shampanni hech qachon yoqtirmagan.
Daily Telegraph manbalariga ko‘ra, qirolichaning sog‘lig‘i yaxshi, lekin yaqinda uni 2004-yildan buyon birinchi marta hassada ko‘rishgan.
