Андижон вилоятида ўтказилган тезкор тадбирда гиёҳванд моддалар савдоси билан шуғулланувчи жиноий гуруҳ аъзолари қўлга олинди, деб хабар беради вилоят ИИБ ахборот хизмати.
Маълум қилинишича, 6 май куни «Қорадори-2022» тадбири давомида четдан контрабанда йўли орқали кириб келаётган ҳамда транзит ташилаётган гиёҳвандлик воситаларини аниқлаш бўйича ИИВ ЖҚББ ҳамда Андижон вилояти ИИБ ЖҚБ ходимлари ҳамкорлигида Хўжаобод туманининг Қирғизистон билан чегара ҳудудида тезкор тадбир ўтказилган.
Тадбир давомида Фарғона вилоятида яшовчи М.А., Қўрғонтепа туманида яшовчи Б.С. ҳамда Ж.М.дан ташкил топган жиноий гуруҳ аъзолари холис харидорга 1 килограмм гашиш гиёҳванд моддасини 9 минг долларга сотаётган вақтида тадбир иштирокчилари томонидан ушланган.
Ҳозирда ушбу ҳолат юзасидан Хўжаобод тумани ИИБ томонидан дастлабки суриштирув ишлари олиб борилмоқда.
Аввалроқ Фарғонада томорқасида 100 туп кўкнори етиштираётган шахс аниқлангани, Тошкент шаҳри ва вилоятида кучли таъсир қилувчи дорилар савдоси билан шуғулланган 9 киши ушлангани тўғрисида хабар берилганди.
Изоҳ (0)