Шавкат Мирзиёев Яшнободда нуронийлар билан суҳбатлашди

Шавкат Мирзиёев Яшнобод туманининг «Аҳмад Яссавий» маҳалласида бўлиб, нуронийлар билан суҳбатлашди. Бу ҳақда «Дарё» мухбири хабар берди.

Маълум қилинишича, давлат раҳбари суҳбат давомида маҳалла тизими ҳақида гапирган.

«Аввал маҳалла бор эди, лекин унда шароит йўқ эди. Маҳалла тизими бизга ҳам мактаб. Қайси томони маъқул, қайси томони номаъқуллиги жиҳатдан. Энди президент қабулхоналари туман марказида эмас, маҳаллада бўлади. Маҳалла инсонларнинг масаласини ечадиган макон бўлиши керак», — деган давлат раҳбари.

Президент шу ўринда таълим ва тиббиётга берилаётган эътиборни алоҳида айтган.

«Сўнгги йилларда таълимга, тиббиётга кўп эътибор беряпмиз. Бизга тиббиёт жуда зарур. Инсонлар тиббиётдан рози бўлиши керак. Қарор-фармонларни чиқаряпмиз, мақсадимиз — тиббиёт тизимини ривожлантириш», — дейди Шавкат Мирзиёев.

Аввалроқ Шавкат Мирзиёев Олмазор ва Яшнобод туманларидаги Иккинчи Жаҳон уруши қатнашчиларининг хонадонларида бўлгани тўғрисида хабар берилганди.