Бандлик ва меҳнат муносабатлари вазирлиги «Олий таълим муассасалари талабаларининг давлат идораларида ҳақ тўланадиган стажировка ўташи тўғрисидаги тартибни тасдиқлаш тўғрисида»ги буйруқ ёки қарор лойиҳасини муҳокамага қўйди.
Унга кўра, олий таълим муассасалари талабаларининг давлат идораларида ҳақ тўланадиган стажировка ўташи тўғрисидаги тартиб тасдиқланади.
Таъкидланишича, магистратура талабалари иккинчи ёки учинчи семестрдан кейин 3,5 ой, бакалавриат талабалари тўртинчи семестрдан сўнг 1,5 ой давомида стажировка ўташлари мумкин.
Магистрант стажёрларга стажировка бошланган кунида белгиланган энг кам иш ҳақининг 1,5 баравари (405 минг сўм) миқдорида, бакалавр стажёрлар учун энг кам иш ҳақи миқдорида (270 минг сўм) ҳақ тўланади.
Агар қабул қилувчи ташкилотнинг (стажировка ўташ жойи) жойлашган жойи стажёрнинг яшаш жойидан ёки ОТМ жойлашган жойидан ташқарида вақтинча яшашини талаб қилса, стажёрларни амалиёт ўташ жойига бориш ва турар жой билан таъминлаш (уй-жой учун тўлов) ОТМ томонидан ўзининг локал норматив ҳужжатларида белгиланган тартибда амалга оширилади. Стажировка давомида талаба ОТМ томонидан берилган стажировка кундалигини юритади.
Стажировка даврида талабаларга стипендиялар умумий белгиланган тартибда тўланиши ва иш вақтининг давомийлиги ҳафтасига 36 соатдан ошмаслиги қайд этилган. Ҳужжат муҳокамаси 20 майга қадар давом этади.
Бундан олдин Ўзбекистондаги ҳар бир ОТМ Олий таълим вазирлиги билан биргаликда Бандлик марказларини ташкил этиши, Ўзбекистонда ОТМларда пуллик ўқув курслари, тўгараклар ташкил этган талабалар даромад солиғидан озод қилиниши, мамлакатдаги барча давлат ташкилотлари ва муассасаларида талабаларнинг ишлашига рухсат берилиши тўғрисида хабар берилганди.
Изоҳ (0)