Мажбурий меҳнат бўйича битта ҳолат бўлса ҳам – бу жиноят. Бу ҳақда Сенат раиси Танзила Норбоева 6 май куни «Одам савдосига ва мажбурий меҳнатга қарши курашиш миллий комиссиясининг» навбатдаги йиғилишида айтиб ўтди, деб хабар бермоқда «Дарё» мухбири.
Таъкидланишича, 2021 йилда 75 та ҳолатда давлат идоралари ходимлари ўз хизмат вазифаларига кирмайдиган ишларга жалб этилган. Ушбу ҳолатларнинг 34 таси халқ таълими тизимида кузатилган. Шунингдек, соғлиқни сақлаш тармоғида 9 та ҳолат, транспорт соҳасида 5 та ҳолат, ободонлаштириш корхоналари тизимида 6 та ҳолат, тадбиркорлик ва қурилиш соҳасида 5 та ҳолат, банк , молия соҳасида 4 та ҳолат, туман, шаҳар ҳокимликларида 5 та ҳолат қайд этилган.
«Бир нарсани яхши англаб олишимиз керак, биз бундай ҳолатларни қоралаймиз, мажбурий меҳнат битта ҳолат бўлса ҳам – бу жиноят. Шунинг учун бу каби ҳолатларга тўлиқ барҳам бериш, мутасадди раҳбарлар масъулиятини янада ошириши керак», — дейди Сенат раиси.
Қайд этилишича, 2021 йилда одам савдосидан жабрланган 52 нафар шахсга 603 млн сўмдан ортиқ моддий зарар етказилган. Одам савдосидан жабрланган шахсларнинг фақат 3 нафарига 19,4 млн сўмлик моддий зарар қоплаб берилган, 49 нафарига моддий зарарни қоплаш бўйича материаллар Мажбурий ижро бюросига ижро учун юборилган. Аммо шу кунга қадар зарар тўлиқ қоплаб берилмаган.
Мавзуга доир:
Изоҳ (0)