Қашқадарё вилоятининг Деҳқонобод туманига келган сел «Жигули» автомобилни оқизиб кетди. Бу ҳақда вилоят Фавқулодда вазиятлар бошқармаси ахборот хизмати хабар берди.
Қайд этилишича, 4 май куни туманнинг тоғли ҳудудларида кучли ёғингарчилик оқибатида сел келиши кузатилган. Натижада айрим аҳоли яшаш уйларининг ҳовлисига, экин майдонларига ва автомобиль йўлларига сув тошган.
Аниқланишича, сел оқибатида Белибойли, Бошчорбоғ, Оқтош ва Чамбил қишлоғи ҳудудларидаги жами 4 та ҳашар йўли билан қурилган кичик кўприк, 13 та хонадон томорқаси ва 3 та ёрдамчи хўжалик (молхона) иморатларига ҳамда 3 та электр узатиш устунларига зиён етказган.
Қўшимча қилинишича, туманнинг Тоғайтемир қишлоғида келган сел маҳаллий аҳолига тегишли «Жигули» автомобилини ҳам оқизиб кетган ва машинани яроқсиз ҳолга келтирган.
Деҳқонобод тумани ҳокимлиги ахборот хизматининг маълумот беришича, туман ҳокими селдан зарар кўрган қишлоққа бориб, одамлардан ҳол-аҳвол сўраган.
Ҳудудга борган ҳоким аҳоли билан мулоқотда селдан зарар кўрган кўприклар тез орада қайта таъмирланишини, сел сувлари тозаланиб, йўллар ҳам тартибга келтирилиши ҳақида маълум қилган.
«Шукрки, ҳеч кимнинг жонига зарар етмаган. Кўприк ва йўлларни тез орада таъмирлаб, муаммони бартараф этамиз. Шунинг учун бу ҳақда ҳеч ҳам ўйламанг», — деган туман ҳокими аҳоли вакиллари билан суҳбатда.
Изоҳ (0)