«Ўзгидромет» 10 майгача қандай об-ҳаво кутилаётганини маълум қилди.
Қайд этилишича, 6 май куни Ўзбекистоннинг катта қисмида кам булутли ва қуруқ об-ҳаво бўлиши кутилмоқда, фақат Қорақалпоғистоннинг шимолида ва Фарғона водийси вилоятларида баъзи жойларда қисқа муддатли ёмғир ёғиши мумкин. Кундузи ҳарорати 24-29 даража атрофида бўлади.
Шанба ва якшанба кунлари республика ҳудудининг катта қисмида қуруқ ва жуда илиқ об-ҳаво бўлиши кутилмоқда. Якшанба куни кундузги ҳаво ҳарорати 30-35 даражагача кўтарилади. Фақат республиканинг шимолий ҳудудлари Кавказ ҳудудларидан кириб келган нам ҳаво массаси таъсири остида бўлади. Қорақалпоғистонда ва Хоразм вилоятида баъзи жойларда қисқа муддатли ёмғир ёғиши, момақалдироқ бўлиши мумкин.
9—10 май кунлари нам ҳаво массаси мамлакатнинг барча ҳудудларини қамраб олади. Республика бўйича баъзи жойларда қисқа муддатли момақалдироқли ёмғир ёғади, 9 майда Қорақалпоғистонда, Хоразм, Бухоро, Навоий вилоятларида, 10 майда республика ҳудудининг катта қисмида кучли жала ёмғирлар ёғиши мумкин. 9 майда кундузги ҳаво ҳарорати 30-35 даража атрофида сақланиб туради, 10 майда 23-28 даражагача пасаяди.
8 майда шимолда ва чўл ҳудудларда, 9—10 майда республика бўйича баъзи жойларда шамол 15-20 метр/секундгача, шимолда ва чўл ҳудудларда 22-25 метр/секундгача кучайиши кутилмоқда, айрим жойларда чанг тўзонлари кузатилиши мумкин.
Эслатиб ўтамиз, Волгабўйи ҳудудларидан нам ва нисбатан салқин ҳаво массалари кириб келиб, кучли ёғингарчилик кузатилгани сабаб Ўзбекистоннинг айрим ҳудудлари, хусусан, Жиззах, Сирдарё, Сурхондарё вилоятларида сел оқимлари ва тошқинлар юзага келди. Пойтахт кўчаларини ҳам сув босди.
Изоҳ (0)