“O‘zgidromet” 10-maygacha qanday ob-havo kutilayotganini ma’lum qildi.
Qayd etilishicha, 6-may kuni O‘zbekistonning katta qismida kam bulutli va quruq ob-havo bo‘lishi kutilmoqda, faqat Qoraqalpog‘istonning shimolida va Farg‘ona vodiysi viloyatlarida ba’zi joylarda qisqa muddatli yomg‘ir yog‘ishi mumkin. Kunduzi harorati 24-29 daraja atrofida bo‘ladi.
Shanba va yakshanba kunlari respublika hududining katta qismida quruq va juda iliq ob-havo bo‘lishi kutilmoqda. Yakshanba kuni kunduzgi havo harorati 30-35 darajagacha ko‘tariladi. Faqat respublikaning shimoliy hududlari Kavkaz hududlaridan kirib kelgan nam havo massasi ta’siri ostida bo‘ladi. Qoraqalpog‘istonda va Xorazm viloyatida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin.
9—10-may kunlari nam havo massasi mamlakatning barcha hududlarini qamrab oladi. Respublika bo‘yicha ba’zi joylarda qisqa muddatli momaqaldiroqli yomg‘ir yog‘adi, 9-mayda Qoraqalpog‘istonda, Xorazm, Buxoro, Navoiy viloyatlarida, 10-mayda respublika hududining katta qismida kuchli jala yomg‘irlar yog‘ishi mumkin. 9-mayda kunduzgi havo harorati 30-35 daraja atrofida saqlanib turadi, 10-mayda 23-28 darajagacha pasayadi.
8-mayda shimolda va cho‘l hududlarda, 9—10-mayda respublika bo‘yicha ba’zi joylarda shamol 15-20 metr/sekundgacha, shimolda va cho‘l hududlarda 22-25 metr/sekundgacha kuchayishi kutilmoqda, ayrim joylarda chang to‘zonlari kuzatilishi mumkin.
Eslatib o‘tamiz, Volgabo‘yi hududlaridan nam va nisbatan salqin havo massalari kirib kelib, kuchli yog‘ingarchilik kuzatilgani sabab O‘zbekistonning ayrim hududlari, xususan, Jizzax, Sirdaryo, Surxondaryo viloyatlarida sel oqimlari va toshqinlar yuzaga keldi. Poytaxt ko‘chalarini ham suv bosdi.
Izoh (0)