Ўзбекистондан май ойининг дастлабки тўрт куни давомида 350—400 тоннага яқин гилос ташқи бозорларга жўнатилди, деб хабар беради EastFruit.
Маълум қилинишича, 2022 йилнинг апрель ойи охири – май ойи бошларида мамлакатда «Баҳор» навли гилос пишиб етилган ва шу вақтдан бошлаб, янги ҳосил гилосини ташқи бозорларга жўнатиш мавсуми ҳам бошланган.
Ўзбекистон экспорт компанияларидан бирининг раҳбари, Фарғонадаги «Ризқ Агро Груп» масъулияти чекланган жамияти директори Шаҳбоз Ўринбоевнинг айтишича, айни пайтда 20 дан 26 миллиметргача калибрли гилос экспортга йўналтирилмоқда. Маҳсулот сифати ва қадоқ турига қараб, 26 миллиметрга яқинроқ калибрли гилосни экспортга жўнатиш нархлари (қадоқлаш ва маҳсулотга ишлов бериш харажатлари ҳисобга олинса) 50—70 минг сўм/килограмм оралиғида бўлиб турибди.
Эслатиб ўтамиз, Ўзбекистон жаҳон бозорида гилоснинг энг йирик экспортёрларидан бири бўлиб, 2021 йили ушбу маҳсулот экспорти бўйича жаҳонда 5-ўринни эгаллаган эди. 2021 йилнинг қиш фасли ва эрта баҳорда кузатилган об-ҳаво аномалиялари данакли мевалар ҳосилига яхшигина зарар етказганига қарамай, гилос 2021 йилда Ўзбекистон экспортини кескин оширган ягона данакли мева маҳсулоти бўлган. Жисмоний жиҳатдан экспорт 2020 йилдаги 29,3 минг тоннага (56,4 миллион доллар) нисбатан 60,1 минг тонна (83,1 миллион доллар)га, яъни, икки баробар ўсган. Бу Ўзбекистоннинг гилос экспорти бўйича тарихдаги рекорд кўрсаткичдир.
Изоҳ (0)