Карине Жан-Пьер Оқ уйнинг янги матбуот котиби этиб тайинланди. Бу ҳақда АҚШ президенти Жо Байден маълум қилди, деб хабар бермоқда президент матбуот хизмати.
«Мен Карине Жан-Пьер Оқ уйнинг навбатдаги матбуот котиби бўлаётганини фахр билан эълон қиламан», — дейилади хабарда.
Байден янги матбуот котиби у ва маъмурият учун «кучли овоз» бўлишини айтган. Матбуот котиби вазифасини бажарувчи Жен Псаки 13 май куни Оқ уйни тарк этади, дея қўшимча қилинган хабарда.
Карине Жан-Пьер АҚШ президенти матбуот котибининг биринчи ўринбосари ва президент ёрдамчисининг ўринбосари лавозимларида ишлаб келаётган эди. У Байден вице-президент бўлган пайтдаги сайлов кампанияси даврида, шунингдек, Обама маъмуриятида алоқа ва сиёсат соҳасида раҳбарлик лавозимларида ишлаган.
Бундан ташқари, Жан-Пьер «MoveOn.org» сайтида жамоатчилик билан алоқалар бўйича бош мутахассис бўлиб фаолият юритган ҳамда NBC ва MSNBC учун сиёсий таҳлилчи бўлган.
Жан-Пьер Оқ уй матбуот котиби лавозимида ишлаган биринчи афроамерикалик аёл бўлади.
Жен Псаки 2011—2013 йилларда АҚШнинг собиқ президенти Барак Обаманинг матбуот котиби бўлиб ишлаган, кейин Давлат департаменти матбуот котиби бўлган. Шундан сўнг, у 2015 йилдан 2017 йилгача Оқ уйнинг алоқа бўйича директори лавозимида ишлаган. 2020 йил 30 ноябрда Байден Псакини Оқ уй матбуот котиби этиб танлади.
2022 йилнинг апрель ойи бошида Axios манбаларга таяниб, Псаки Американинг MSNBC телеканалига ишга ўтмоқчилиги ҳақида ёзганди. У телеканалнинг прайм-тайм дастурларидан бирини олиб борадиган бошловчи Рейчел Меддоунинг ўрнини эгаллайди, дея таъкидлаган нашр.
Мавзуга доир: Оқ уй матбуот котиби Жен Псаки коронавирусга чалинди
Изоҳ (0)