Исроилнинг Элад шаҳридаги истироҳат боғида мамлакат Мустақиллиги кунини нишонлаш вақтида икки эркак ўткинчиларга ҳужум қилди, деб хабар бермоқда The Times of Israel шифокорларга таяниб.
Ҳужум оқибатида уч киши ҳалок бўлган, етти киши яраланган. Jerusalem Post ва Haaretz тўрт нафар жабрланувчи ҳақида ёзган ва улардан икки нафарининг жароҳати оғирлигини қайд этган.
Гувоҳларнинг сўзларига кўра, ҳужумчилардан бири ўқотар қурол, иккинчиси болта ёки катта пичоқ билан қуролланган бўлган. Улар паркнинг турли қисмларида операция олиб борган ва ҳужумдан кейин қочиб кетган. Айни пайтда уларни қидирмоқда.
The Times of Israel нашрига кўра, Фаластиннинг ҲАМАС гуруҳи ҳужумни «қаҳрамонлик операцияси» деб атаган. Қайд этилишича, бу яҳудийларнинг 5 май куни мусулмонлар ва яҳудийлар учун муқаддас жой бўлган Маъбуд тоғига ташрифига жавобан уюштирилган.
Март ойи охиридан бери камида 16 нафар исроиллик терактлар қурбони бўлди, деб ёзади нашр. Ҳужумларнинг кўпайишига жавобан Исроил армияси рейдлар уюштирган, оқибатда эса 26 нафар фаластинлик ўлдирилган.
Апрель ўрталарида фаластинликлар ва Исроил хавфсизлик кучлари ўртасидаги таранглик яна кучайди. Маъбад тоғидаги ал-Ақсо масжиди атрофида икки томоннинг тўқнашувлари бўлиб ўтди.
Изоҳ (0)