Mercedes автомобилларини тюнинг қилиш билан шуғулланувчи Brabus компанияси Mercedes-Maybach GLS 600 кроссоверининг «900» индекси остидаги версиясини тақдим этди.
Brabus дизайнерлари оригинал Mercedes-Maybach GLS 600 нинг ташқи кўринишини жиддий ўзгартирмаган, унинг углерод пластикли кенг ғилдираклар аркаси, олд бамперининг пастки қисми ва автомобиль «қуйруқ» қисмидаги диффузори сақланиб қолган. Асосий ўзгариш — кузовдаги ортиқча хромнинг олиб ташлангани.
Кроссоверга Mercedes-Maybach S-Class дискалари дизайнига ишора қилувчи янги 24 дюймли ғилдираклар ўрнатилади. Бундан ташқари, пневматик «подваска»сининг созламалари ҳам ўзгартирилган: катта тезликда у йўл юзаси билан оралиқ масофани 25 миллиметрга қадар қисқартиради.
Автомобиль салонининг орқа қаторидан иккита алоҳида «капитан» ўриндиқлари ўрин олган — бу Mercedes-Maybach GLS 600 учун энг ҳашаматли вариант. Салон тўлиқ углерод пластикли нақшларга эга қимматбаҳо чарм билан қопланган.
Янги Brabus 900 қуввати 557 дан 900 от кучига етадиган V8 битурбомотор билан жиҳозланган. Бунинг ёрдамида GLS соатига 70 километрга тезлашган: максимал тезлиги 320 километр/соатга қадар етади. Автомобилнинг соатига 100 километр тезликка чиқиши учун 4,2 сония кифоя қилади.
Энг қизиқ жиҳати — нархида: биринчи йиғилган Brabus 900 нархи 532 минг долларни ташкил этади. Таққослаш учун, Германияда Mercedes-Maybach GLS 600 нархи 177,5 минг доллардан, Ўзбекистонда эса 258 минг доллардан бошланади.
Аввалроқ Brabus 3,2 сонияда соатига 100 километр тезликка эриша оладиган дунёдаги энг тезкор кроссоверни тақдим этганди.
Изоҳ (0)