АҚШда 1910 йилда ишлаб чиқарилган Pioneer 30-60 трактори сотувга қўйилди. Худди локомотивга ўхшайдиган улкан ғилдиракларга эга қадимий машина 500 минг долларга баҳоланмоқда. Бу пулга Rolls-Royce Ghost’нинг Black Badge номли махсус версиясини харид қилиш мумкин, деб хабар беради Motor.
Трактор Миннесота штатининг Уинона шаҳридаги Pioneer Tractor Мfg.Cо. фирмаси томонидан ясалган. У 1900 йиллар бошидан 1927 йилга қадар — Буюк депрессия бошлангунга қадар қишлоқ хўжалиги техникаси бўйича муваффақиятли савдоларни амалга оширган.
Мазкур трактор 1910 йилда ишлаб чиқарилган бўлиб, бу компаниянинг энг машҳур ва энг биринчи модели ҳисобланади. 10 тоннали машинанинг орқа ғилдираклари диаметри 2,4 метрни ташкил этади, 20,2 литр ҳажмга эга тўрт цилиндрли двигатели эса 60 от кучини тақдим этишга қодир. Трактор соатига 10 километр тезликда ҳаракатлана олган.
ХХ аср бошларида ушбу модель нархи 2,7 минг долларга баҳоланган — ҳозирги кунда бу 77,5 минг доллар эквивалентни ташкил этади. Компания ўзининг реклама ролигида машинанинг бу қадар қимматлигини Pioneer «бошқа ишлаб чиқарувчиларнинг тракторларидан фарқли равишда ҳеч қандай камчиликка эга эмаслиги» билан изоҳлаган.
Ҳозирда ноёб трактор 500 минг долларга баҳоланмоқда. Модель 17 йил давомида ишлаб чиқарилганига қарамай, бугунги кунга қадар Pioneer’нинг 14 та модели етиб келган, холос. Мустақил юра оладиганлари эса саноқли бўлиб, улар орасида 1997 йилда тўлиқ реставрация қилинган мазкур модель ҳам бор.
Изоҳ (0)